Барча хўжалик юритувчи субъектлар Ўзбекистон Республикаси Вазирлар Маҳкамасининг 2021 йил 28 апрелдаги 249-сон қарори билан тасдиқланган Ягона электрон миллий каталогига мувофиқ товарларнинг (хизматларнинг) идентификация кодлари ва ушбу товарларнинг (хизматларнинг) штрих кодларини ўзлари расмийлаштирган ҳисобварақ-фактураларида албатта акс эттиришлари шарт.
Солиқ назорати давомида солиқ тўловчилар томонидан қалбаки ёки кўзбўямачилик учун битимлар (бундан кейин – баҳсли операциялар) тузиш, ҳақиқий операцияларга ёки уларнинг иқтисодий мазмунига мос келмайдиган товарларни ёхуд хизматларни ноқонуний равишда ҳисобварақ-фактураларда акс эттириш факти аниқланганда, солиқ органлари солиқ тўловчилар томонидан ноқонуний равишда расмийлаштирилган ҳисобварақ-фактураларни келгусида расмийлаштириш имкониятини тўхтатиб қўйишлари мумкин.
Баҳсли операцияларни амалга ошириш аломатлари – солиқ тўловчилар томонидан кирим қилинмаган товарларнинг номлари ва идентификация кодларини реализация бўйича ҳисобварақ-фактураларида акс эттирилиши (савдо операциялари бўйича) ёки солиқ тўловчи фаолиятининг моҳияти ва ҳажмини (битимнинг ҳажми ва шунга ўхшаш операцияларнинг мунтазамлигини амалга оширилиши), реализация қилинаётган товарларнинг (ишлар, хизматларнинг) ўзига хос хусусиятларини ҳисобга олган ҳолда (ижрочига нисбатан махсус талаблар, шу жумладан лицензиялар, баъзи операцияларни бажариш учун рухсат ва рухсатномаларнинг мавжудлиги) операцияларни (ишлар, хизматларни) ҳақиқатда бажара олиш мумкин эмаслигидир.