Abdulla Abdisalamovich Azizov 2019-yil sentabr oyidan buyon Davlat soliq qo‘mitasi raisi o‘rinbosari lavozimida ishlab kelayotgan edi. O‘tgan vaqt davomida u O‘zbekiston davlat soliq xizmatining IT-infrastrukturasini yangi sifat darajasiga ko‘tardi.
U soliq ma’muriyatchiligini raqamlashtirish, soliq to‘lovchilar uchun masofaviy xizmat turlarini kengaytirish, soliq majburiyatlarini bajarishlari uchun qulay shart-sharoitlar yaratish borasida katta ishlarni amalga oshirdi.
“Internet kompaniyalar QQS ofisi” yaratilib, hozirgacha O‘zbekistonda istiqomat qiluvchilarga elektron xizmatlar ko‘rsatadigan 17 ta xorijiy kompaniya soliq to‘lovchi sifatida ro‘yxatdan o‘tdi.
Masofaviy soliq xizmatlari soni 35 tadan 46 taga ko‘paydi, “SOLIQ” mobil ilovasi ishga tushirildi. Bugungi kunda 17 ming nafarga yaqin shaxs ilovada mavduj bo‘lgan 16 turdagi elektron xizmatlardan foydalanmoqda.
Tadbirkorlar sektor rahbarlariga to‘g‘ridan-to‘g‘ri murojaat qilib, muammolarini tezda hal etishlari uchun maxsus “@SektorUzBot” telegram boti ishga tushirildi.
Toshkent viloyati Bo‘stonliq tumanida ijaraga beriladigan dam olish ob’yektlarini ro‘yxatga olish uchun orom.uz yagona elektron platformasi yaratildi.
Soliq organlarida biznes jarayonlarini reinjiniring qilish bo‘yicha Soliq tizimining raqamli kelajagi strategiyasi qabul qilindi.
A.Azizov tomonidan amalga oshirilgan har bir loyiha muvaffaqiyat va istiqbolga qaratilgan.
Soliq xizmati imidjini o‘zgartirishda Abdulla Abdisalamovichning hissasi beqiyos. 2019-yil dekabrda o‘tkazilgan rebrending davlat soliq xizmati organlarining soliq to‘lovchilarga qanchalik do‘stona va yaqin munosabatda bo‘lganini ko‘rsatib berdi.
Davlat soliq qo‘mitasi jamoasi Abdulla Abdisalamovichni yangi lavozimga o‘tishi munosabati bilan chin dildan qutlaydi. Soliq tizimida zamonaviy axborot-kommunikatsiya texnologiyalari tatbiq etilishidagi hissasi uchun minnatdorlik bildiradi hamda yangi lavozimda ulkan muvaffaqiyatlar tilaydi.
DSQ Matbuot xizmati