Давлат солиқ хизмати органларига Республика махсус комиссиясининг автотранспорт воситаларининг ҳаракатига вақтинча чеклов жорий этиш тўғрисидаги қарори муносабати билан бозорлардаги қишлоқ хўжалиги маҳсулотлари нархининг сунъий равишда ошиб кетишига оид кўплаб мурожаатлар келиб тушмоқда.
Кўпчилик карантин кунларида транспорт воситаларининг ҳаракатланиши чекланганлиги сабабли, қишлоқ хўжалиги маҳсулотлари энди олиб кирилмайди деган фикрда.
Ушбу маълумотлар ҳақиқатга мос келмайди.
Тошкент шаҳар ИИББ маълумотига кўра, барча постларга қишлоқ хўжалиги маҳсулотлари ортилган автотранспорт воситаларини ҳеч қандай ортиқча тўсиқларсиз (лекин, кузовга мажбурий санитар ишлов берилгандан кейин) ўтказиб юбориш топшириғи берилган. Қарорда айтилганидек, чеклов юк автомобилларига, айниқса, қишлоқ хўжалиги маҳсулотлари етказиб берувчиларига татбиқ этилмайди.
Бундан ташқари, супермаркетлар, озиқ-овқат бозорлари, шунингдек, маҳаллаларда, аҳоли яшаш пунктларида жойлашган озиқ-овқат дўконлари ҳам фаолиятини давом эттиради.
Саросима уйғотиш – бозорларда, дўконларда одамлар ўртасида оммавий тартибсизлик келтириб чиқариш карантин қоидаларини бузиш ҳисобланади ва бу фақат коронавируснинг тарқалишига ёрдам беради!
Тадбиркорларга эслатма: нархларнинг асоссиз оширилиши учун жавобгарлик назарда тутилган!
Ҳурматли ватандошлар! Агар сиз маҳсулотларнинг нархларини асоссиз оширилишига гувоҳ бўлсангиз, биринчи навбатта ДСҚнинг (71)244-98-98 рақамли “Ишонч телефони”га ёки 1198 қисқа рақамли “Call-маркази”га мурожаат қилишингизни сўраймиз.