Mamlakatimiz Prezidenti topshirigʼi asosida davlat idoralarining bevosita birinchi rahbarlari hududlarga chiqqan holda, fuqarolar bilan yuzma-yuz uchrashib, aholini qiynab kelayotgan muammoli masalalarga yechim topishga yordam bermoqdalar.

Аna shunday sayyor qabullardan biri kuni kecha Oʼzbekiston Respublikasi Davlat soliq qoʼmitasi raisi Behzod Musaev tomonidan Surxondaryo viloyati Sherobod tumanining “Oltin voha” mahalla fuqarolar yigʼinida aholi va tadbirkorlik subʼektlari vakillari uchun tashkil etildi.

Sayyor qabulda ishtirok etgan aholi va tadbirkorlik subʼektlari vakillarining turli masalalarga oid 56 ta murojaatlari koʼrib chiqildi. 21 tasi joyida hal etilib, 5 ta murojaat yuzasidan asosli tushuntirishlar berildi. 30 ta murojaat ijrosi uchun muddatlar belgilanib, tegishli tashkilot va idoralar tomonidan bajarilishi nazoratga olindi.

Tumanning “Bahor” mahallasida istiqomat qilib kelayotgan bir guruh fuqarolar murojaat qilib, mahalladagi artezian qudigʼining suv nasosi kuyib qolgani uchun 2 yildan beri suvni sotib olib ichayotganligini bildirdi. Suv nasosi yangisiga almashtirilib, 350 xonadon suv bilan taʼminlandi.

“Xoʼjgi” qishlogʼidan kelgan 10 dan ortiq fuqarolar elektr toki pastligidan aziyat chekayotganligini bildirishdi. Ularning ushbu muammolari bartaraf etiladigan boʼldi. Mazkur qishloqda yashovchi 200 dan oshiq xonadonni elektr toki bilan taʼminlaydigan 10 000 vatt quvvatga ega yangi transformator oʼrnatilishi yuzasidan mutasaddi tashkilotlarga topshiriq berilib, ijrosi nazoratga olindi.

– Mahallamizning yoʼli qishda loy, yozda chang boʼlib ketadi, – dedi “Oyinli” mahallasida yashovchi fuqaro Farogʼat Xoʼjamurodova. – Bugun sayyor qabulda ayni shu masalada yordam soʼradim. – Murojaatim ijobiy hal etildi. Shu kunning oʼzida mahallamiz koʼchasiga tosh-shagʼal yotqizish ishlari boshlab yuborildi. Biz juda hursand boʼldik. Sababi yillar davomida hal etilmagan ushbu muammo oʼz yechimini topdi.

Sayyor qabul davomida 10 nafar fuqaroga gaz plitasi, 10 nafar fuqaroga elektr pech, 2 nafar fuqaroga davolanishi uchun imtiyozli order berildi. 4 nafar nogironligi bor shaxslarga nogironlik aravachalari, 2 nafar ijtimoiy himoyaga muhtoj va kam taʼminlangan oilalar bandligini taʼminlash orqali daromadlarini oshirishlari uchun tikuv mashinasi berildi.

– Mening yoshim 23 da. Taqdir ekan, yosh holimda nogiron boʼlib qoldim, – deydi “Mehnatobod” mahallasida istiqomat qilib kelayotgan fuqaro Feruza Qodirova. – Yaratganga shukr, qoʼllarim butun, oʼtirgan holda bemalol ishlashim mumkin. Shu maqsadda tikuvchilik oʼquv markazida oʼqidim, tikuvchilik sirlarini oʼrgandim. Oilaviy sharoitimiz ogʼirligi uchun nogironlik aravachasi ham tikuv mashinasi ham ololmaganman. Bugun ikkita muammom hal boʼldi. Davlat soliq qoʼmitasi raisi murojaatimni tinglab, menga nogironlik aravachasi va tikuv mashinasi berdi. Oʼzimda yoʼq hursandman. Endi tikuvchilik bilan shugʼullanib, daromad topadigan boʼldim, oilamizga ham nafim tegadigan boʼldi. Endi mana bu nogironlik aravachasida bemalol uydan tashqariga, qoʼshnilarnikiga chiqaman, koʼngil yozib, tevarak-atrofni tomosha qilaman.

Qabul jarayonida Yangi yil bayrami yaqinlashayotganligi munosabati bilan aholiga arzonlashtirilgan savdo yarmarkasi tashkil etildi. Uy roʼzgʼori uchun kerakli mahsulotlar hamda koʼmir arzon narxlarda sotildi.

Shuningdek, Davlat soliq qoʼmitasi raisi 5 ta kam taʼminlangan oilalarda ham boʼlib, ularning yashash sharoiti bilan yaqindan tanishib oziq-ovqat mahsulotlari bilan amaliy yordam koʼrsatdi.

– Bugun bizning xonadonimizga kelib holimizdan xabar olishdi. Bir necha turdagi oziq-ovqat va qishloq xoʼjaligi mahsulotlari berishdi, – deydi tumaning “Gʼambur” mahallasida yashovchi fuqaro Shoxista Qulsoatova. – 2018 yil Turmush oʼrtogʼim avtohalokatga uchrab, nogiron boʼlib qoldi. Shu sabab oilaviy sharoitimiz qiyinlashib qoldi. 3 nafar nafar farzandim bor, oʼzim ishlamayman, turmush oʼrtogʼimni nafaqa puliga kun kechiramiz. Buni inobatga olib, koʼrsatilgan bunday yordamdan juda hursandman. Bitmagan uyim uchun ham zarur boʼlgan qurilish mahsulotlarini olib berishda yordam koʼrsatiladigan boʼldi.

Аytish kerakki, hududlardagi muammolarni aniqlash va ularning tezkor yechimini topish yuzasidan olib borilayotgan ishlar oʼzining ijobiy samarasini bermoqda. Bu esa xalq davlat idoralariga emas, davlat idoralari xalqqa xizmat qilayotganidan dalolatdir.

Surxondaryo viloyati davlat soliq boshqarmasi Matbuot xizmati