Mamlakatimiz soliq tizimida zamonaviy axborot kommunikatsiya texnologiyalari imkoniyatlaridan keng foydalanilayotganligi tadbirkorlik subyektlariga ko‘plab qulaylik va imkoniyatlar taqdim etmoqda. Hisobvaraq-fakturalar, ishonchnoma, bajarilgan ishlar dalolatnomasi, tovar-transport yukxati va boshqa hujjatlarni elektron tarzda shakllantirish imkoniyati shular jumlasidandir.

Sirdaryo viloyatida 2020-yil 1-iyul holatiga ko‘ra, ro‘yxatdan o‘tgan va soliq to‘lash majburiyatiga ega 12 231 ta korxonadan 9 729 tasi hisobvaraq-fakturalarning elektron shaklidan foydalanmoqda. Bu viloyatda mavjud jami korxonalarning 79,5 %ini tashkil etadi.

EHFdan foydalanmagan 2502 ta korxonaga soliq organlaridan malakali xodimlar biriktirilgan bo‘lib, ularga amaliy yordam ko‘rsatilmoqda.

– Elektron hisobvaraq-fakturalar tizimi, ayniqsa, qo‘shilgan qiymat solig‘i to‘lovchilari orasida tobora ommalashib bormoqda, – deydi Sirdaryo viloyati davlat soliq boshqarmasi bo‘lim boshlig‘i o‘rinbosari Abror Kenjayev. – Xususan, 3 457 ta qo‘shilgan qiymat solig‘i to‘lovchilarining 3304 tasi yoki 95,6 foizi o‘z faoliyatida ushbu tizimni faol qo‘llayapti. Bu esa hujjat aylanishining tezkorligini, soliq hisobotlarini o‘z vaqtida yuborilishini ta’minlashga xizmat qilmoqda.

Birgina “Malik sharobsavdo” mas’uliyati cheklangan jamiyati tomonidan 2019-yilda 755 ta EHF dan foydalangan holda 31 milliard 20 million so‘mlik hujjatlar almashilgan.

– 2020-yilning 1-iyul holatiga ko‘ra, korxonamiz 345 ta EHF dan foydalanib, 22 milliard 372 million so‘mlik hisob-kitoblarni amalga oshirdi, – deydi jamiyat hisobchisi Baxtiyor Hakimov. – Mazkur tizimning soliq to‘lovchilarga afzalliklari juda ko‘p. Elektron hisobvaraq-fakturalar biznes hamkorlar va soliq idoralari bilan shaffof siyosatni olib borishga xizmat qiladi. QQS zanjiri uzilishining oldini olishga yordam beradi. Ayni jihatlar qo‘shimcha soliq hisoblanishning eng ko‘p tarqalgan sabablari bo‘lib, xato va kamchiliklardan maksimal himoya qiladi.

Hozir viloyatimizda 9700 dan ziyod yuridik shaxs va 1039 dan ortiq YATT EHF tizimi foydalanuvchisi sanaladi. 10 810 nafar tadbirkorlik subyekti tomonidan rasmiylashtirilgan EHFlarning umumiy soni esa 115 975 tani tashkil etadi.

Ushbu hujjatlarning har biri EHF operatorlarining ma’lumotlar bazasida kamida 5 yil, shuningdek, rouming operatorida 10 yil davomida xavfsiz saqlanadi. Bu yangi tizimning soliq to‘lovchilar uchun qulay va ishonchli ko‘makchi ekanligining isbotidir.

Sirdaryo viloyati DSB Matbuot xizmati