kirill alifbosida o‘qish

O‘zbekiston Respublikasining O‘RQ-599-son Qonuni hamda Soliq kodeksiga muvofiq Vazirlar Mahkamasining “Qo‘shilgan qiymat solig‘i hamda chet el yuridik shaxslari bilan bog‘liq soliq ma’murchiligini takomillashtirish to‘g‘risida”gi qarori loyihasi tayyorlandi.

Mazkur qarorga asosan soliq ma’muriyatchiligini tartibga soluvchi 6 ta nizom tasdiqlanishi kutilmoqda. Jumladan: 

I. QQS summasi o‘rnini qoplash tartibi to‘g‘risidagi nizom bilan:

- soliq summasini qoplash uchun asos bo‘luvchi hamda eksport operatsiyalarini tasdiqlovchi hujjatlar va ularni taqdim etish;

- qoplanadigan soliq summasini asoslanganligi yuzasidan kameral soliq tekshiruvini o‘tkazish;

- soliq summasini qoplash va uning amalga oshirishning tezlashtirilgan;

- chet el diplomatik va ularga tenglashtirilgan vakolatxonalarga hamda mahsulot taqsimotiga oid bitim ishtirokchilariga soliq summasini qoplash (qaytarish) tartiblari;

II. Hisobvaraq-fakturalarning shakli va ularni to‘ldirish tartibi to‘g‘risidagi nizom bilan:

- tovarlar (xizmatlar) realizasiyasida hisobvaraq-fakturalarni to‘ldirish;

- dori vositalari va tibbiy buyumlarni realizatsiya qilishda, vositachilik, topshiriq va transport ekspeditsiyasi shartnomalari asosida tadbirkorlik faoliyatini amalga oshirishda va ayrim shartnomalar bo‘yicha tovarlarni (xizmatlarni) realizatsiya qilishda hamda chegirmalarni taqdim etishda hisobvaraq-fakturalarni rasmiylashtirishning hamda ularni elektron qabul qilish va jo‘natishning o‘ziga xos xususiyatlari;

III. QQS bazasini tovarlarning (xizmatlarning) bozor qiymatidan kelib chiqib aniqlash tartibi to‘g‘risidagi nizom bilan:

- QQSni hisoblash va to‘lash chog‘ida tovarlarning (xizmatlarning) bozor qiymatini aniqlash tartibi;

IV. Tovarlarga (xizmatlarga) haq to‘lash bo‘yicha majburiyat umid qilib bo‘lmaydigan qarzdorlik deb e’tirof etilganda va uni hisobdan chiqarish lozim bo‘lgan hollarda QQS bazasiga tuzatish kiritish tartibi to‘g‘risidagi nizom bilan:

- tovarlarga (xizmatlarga) haq to‘lash bo‘yicha majburiyatni umid qilib bo‘lmaydigan qarzdorlik bo‘yicha qaror qabul qilish shartlari;

- QQS bazasiga tuzatishlar kiritish qoidalari;

V. Chet el yuridik shaxslarida ishtirok etish to‘g‘risidagi xabarnomalarning shakllari, ularni to‘ldirish va taqdim etish tartibi to‘g‘risidagi nizom bilan:

- xabarnomaning shakli va mazmuni, shuningdek umumiy talablar va ularni to‘ldirish tartibi, shu jumladan jismoniy shaxslar, xorijiy yuridik shaxslar, O‘zbekiston Respublikasi korxonalari, yuridik shaxs tashkil etmagan xorijiy tuzilmalar to‘g‘risidagi ma’lumotlar, shuningdek soliq to‘lovchining xorijiy yuridik shaxsida bilvosita ishtirok etish tartibi;

VI. Nazorat qilinadigan chet el kompaniyalari haqidagi xabarnomalarning shakllari, ularni to‘ldirish va taqdim etish tartibi to‘g‘risidagi nizom bilan:

- xabarnomaning shakli va mazmuni, shuningdek umumiy talablar va ularni to‘ldirish tartibi, shu jumladan chet el kompaniyalarini boshqaruvchi shaxslar deb hisoblangan jismoniy yoki yuridik shaxs to‘g‘risidagi ma’lumotlar, ularning moliyaviy hisoboti, boshqariladigan xorijiy kompaniyada bilvosita ishtirok etish to‘g‘risidagi ma’lumotlar.

Mazkur nizomlar bilan belgilanayotgan tartiblar va qoidalar yangi tahrirda qabul qilingan Soliq kodeksining ayrim normalarini to‘g‘ri qo‘llash uchun soliq to‘lovchilarga hamda soliq ma’muriyatchiligini tashkil etishda qo‘shimcha qulayliklar yaratishi bilan bir qatorida, soliq solishning aniqlilik, adolatlilik va oshkoralik prinsiplarini ta’minlashga xizmat qiladi.

Muhokama 2020-yil 4-iyulgacha davom etadi.

DSQ Matbuot xizmati