Бугун, сешанба куни Фарғона вилоятидаги бозорлар ва йирик савдо марказларида нарх-наво қандай? Картошка ростдан ҳам тақчилми, нархи асоссиз кўтарилганми?
Мана шу саволларга аниқ жавоб топиш мақсадида вилоятдаги айрим деҳқон бозори ва Фарғона шаҳридаги “Asia.uz” савдо мажмуасига ташриф буюрдик.
Фарғона шаҳридаги Марказий деҳқон бозори
Марказий деҳқон бозорида одатдагидек савдо жараёни кетмоқда, карантин сабаб харидорлар ҳам у даражада кўп эмас. Эътиборлиси, бозор расталари қоп-қоп сара картошка, пиёз-у сабзилар, ун, пахта ёғи каби озиқ-овқат маҳсулотлари билан тўла.
Ҳеч қандай узун навбатлар, тақчиллик, “осмондаги нархлар” ҳақида гап бўлиши мумкин эмас. Картошка 3000-4000 сўмдан сотилмоқда. Бемалол кириб истаганингизча харид қилишингиз мумкин.
Фарғона Марказий деҳқон бозоридаги айрим қишлоқ хўжалиги маҳсулотларининг 31 март куни кузатилаётган нарх-навоси:
1 кг картошка – 3000-4000 сўм;
1 кг пиёз – 1500-2500 сўм;
1 кг сабзи – 1000-2000 сўм;
1 дона тухум – 550-800 сўм;
1 кг гуруч – 5000-12000 сўм.
“Asia.uz” савдо мажмуасида ҳам худди шундай ҳолат: нон, гўшт ва қишлоқ хўжалиги маҳсулотларини истаганингизча олишингиз мумкин, нарх-наво ҳам жойида. Бу ерда 1 кг картошка 3940 сўмдан сотилмоқда.
Бу ерда ҳам харидорлар жуда кам, лекин мева-сабзавотлар, турли хил кўкатлар ва бошқа озиқ-овқат маҳсулотлари савдо расталарини тўлдириб турибди. Нарх-наво ҳам барқарор, “нархи кескин кўтарилиб кетди” дея ваҳималарга сабаб бўлаётган картошка 3500-4000 сўмдан сотилмоқда.
Марғилон шаҳридаги деҳқон бозори
Аҳоли кундалик эҳтиёжи учун зарур барча маҳсулотлар бозорга узлуксиз етказилиб турибди, нарх-наво ҳам асоссиз оширилгани йўқ.
Бозорда харидорлар одатдагидан кам. Картошка, сабзи, пиёз каби маҳсулотларни сотиб олиш учун ҳеч қандай навбат ёки ур-тўполон йўқ. Бундан ташқари, мазкур бозорда картошка ортиғи билан захира қилинган.
Карантин даврида аҳолини озиқ-овқат маҳсулотлари билан узлуксиз таъминлаш, уларнинг нарх-навоси асоссиз ошириб юборилишининг олдини олиш борасида доимий назорат йўлга қўйилган.
Фарғона вилоят ДСБ Матбуот хизмати