O‘zbekiston Respublikasi Vazirlar Mahkamasining 2021-yil 28-apreldagi “Mahsulotlar (tovar va xizmatlar) yagona elektron milliy katalogini joriy etish, tadbirkorlik sub’yektlari o‘rtasida tuzilgan shartnomalarni elektron ro‘yxatdan o‘tkazish va tovar-moddiy boyliklarni olish uchun ishonchnomalarni elektron rasmiylashtirish chora-tadbirlari to‘g‘risida”gi 249-sonli qarori bilan mahsulotlarning (tovarlar va xizmatlarning) yagona elektron milliy katalogi tasdiqlangan.
Hozirda ushbu katalogga 79 mingdan ortiq identifikasiya kodlari yaratilgan bo‘lib, tasnif.soliq.uz sayti orqali kodlarni mustaqil ravishda izlash, bunda besh bosqichli so‘rovnomaga ketma-ket javob berish orqali kerakli mahsulot kodini osonlik bilan topish mumkin.
O‘zbekiston Respublikasi Prezidentining 2021-yil 4-oktabrdagi PQ-5252-sonli qarori bilan 2022-yil 1-yanvardan boshlab:
- chakana savdo, umumiy ovqatlanish va aholiga maishiy xizmat ko‘rsatish ob’yektlarida xaridni amalga oshirgan va ushbu xaridni soliq organlarining maxsus mobil ilovasida xarid chekining fiskal belgisini matrisali shtrix kod (QR-kod) yordamida skanerlash orqali ro‘yxatdan o‘tkazgan jismoniy shaxslarga xarid summasining 1 foizi respublika byudjetidan qaytarilishi belgilangan; (avtomobil sotib olganlik uchun, temir yo‘l va avia chipta xaridi, kommunal va aloqa xizmati uchun to‘lovni amalga oshirganda olingan xarid cheklari mustasno);
- mahsulotlar (tovarlar va xizmatlar) yagona elektron milliy katalogi identifikasiyalash kodlari (MXIK) to‘g‘ri aks ettirilmagan onlayn nazorat kassa mashinasi va virtual kassa cheklarini taqdim etish taqiqlangan;
- tadbirkorlik sub’yektlari uchun 2023-yil 1-yanvarga qadar onlayn nazorat-kassa mashinasi va virtual kassaga ulangan, shtrix-kodlar va raqamli markirovka kodlarini oson, to‘g‘ri o‘qilishi va aniqlashni ta’minlovchi 2D skanerlar, ma’lumotlarni yig‘uvchi terminallar yoki boshqa turdagi maxsus qurilmalarning maxsus qurilmalarini sotib olgan taqdirda, maxsus qurilmalarning har birini sotib olish bilan bog‘liq xarajatlar summasiga, lekin bitta qurilma uchun bazaviy hisoblash miqdorining 4 baravarigacha bo‘lgan miqdorda soliq summalarini kamaytirish huquqi berilgan.
O‘zbekiston Respublikasining 2021-yil 29-dekabrdagi O‘RQ-741-sonli “O‘zbekiston Respublikasining Soliq kodeksiga o‘zgartirish va qo‘shimchalar kiritish to‘g‘risida”gi Qonuni bilan hisobvaraq-fakturalarda yoki nazorat kassa texnikasi cheklarida olingan tovarlar (xizmatlar) nomenklaturasiga yohud faoliyatining o‘ziga xos xususiyatlariga va amalga oshiriladigan turlariga muvofiq bo‘lmagan identifikasiya kodlari (MXIK)ni aks ettirish – xisob varaq fakturalarda yoki nazorat-kassa texnikasi (onlayn-NKM va virtual kassa) cheklarida ko‘rsatilgan realizasiya qilingan tovarlar (xizmatlar) qiymatining bir foizi miqdorida jarima solishga sabab bo‘lishi belgilandi.
Yuqoridagilardan kelib chiqib, Sizdan o‘zingizga tegishli bo‘lgan onlayn-NKM qurilmasi (virtual kassa)ga MXIK kodlarini to‘g‘ri aks ettirgan holda mahsulot va xizmat uchun chek taqdim qilishingiz so‘raladi.
Eslatma: 2022-yildan boshlab QQS va aylanma soliq hisobotlaridagi jami tushum va imtiyoz summalari - elektron hisobvaraq-faktura, onlayn-NKM (virtual kassa) cheklari va marketpleyslar orqali realizasiya qilingan tovarlar summasi va ularda MXIK asosida qayd etilgan imtiyozlar asosida avtomatik shakllanadi.