Давлат солиқ қўмитаси, Бош прокуратура ҳузуридаги Департамент билан ҳамкорликда коронавирус пандемияси натижасида карантин эълон қилинганлиги муносабати билан бозорлар ва савдо марказларида озиқ-овқат ва зарур тиббий воситалар нархларининг сунъий ошиб кетмаслигини қатъий назорат қилиб бормоқда.

Давлат солиқ органлари ишонч телефонлари орқали озиқ-овқат маҳсулотларининг нархи ошиб кетиши юзасидан қабул қилинган мурожаатлар тезда ўрганилиб, аниқланган муаммолар жойида ҳал этилмоқда.

Бундан ташқари, давлат солиқ хизмати ходимлари ҳудудлардаги бозорлар ва савдо мажмуаларида мониторинг тадбирлари ўтказмоқда.

Жорий йил 17 март куни Андижон туманида жойлашган “Куйган-ёр деҳқон бозори”да озиқ-овқат маҳсулотларининг нархлари сунъий оширилишининг олдини олиш тадбирлари давомида фуқаро С.М. ҳеч қандай ҳужжатларсиз, қиммат нархда ўсимлик ёғи сотаётганлиги аниқланди. Бу “учар” тадбиркорга нисбатан маъмурий баённома расмийлаштирилиб, 1 миллион 729 минг сўмлик жами 160 литр ўсимлик ёғи масала қонуний ҳал бўлгунга қадар вақтинчалик олиб қўйилди.

Тадбирлар давомида Асака тумани деҳқон бозорида яна бир “уддабурон” фуқаро И.С. картошка нархини ошириб сотаётганлиги маълум бўлди. фуқаро И.С.дан тадбиркорлик билан шуғулланиш учун ҳужжатлар сўралганида “ер чизиб” қолди. Ундан 1 миллион 150 минг сўмлик қишлоқ хўжалиги маҳсулоти далилий ашё сифатида иш қонуний ҳал булгунга қадар вақтинчалик олиб қуйилди

Шаҳрихонлик фуқаро А.А. ҳам айрим фуқароларнинг асоссиз саросимага тушиб картошкага талаби ортганлигидан ўз нафси йўлида фойдаланишга уринди. Унинг савдо қилиш ҳуқуқини берувчи ҳужжатларсиз картошкани улгуржи нархда олиб, устига нарх қўйиб сотаётганлиги аниқланди.

Натижада фуқаро А.А. сотаётган 360 килограмм миқдордаги озиқ-овқат маҳсулоти тегишли тартибда расмийлаштирилиб, масала қонуний ҳал бўлгунга қадар вақтинчалик сақлашга олинди.

Андижон вилояти ДСБ

Матбуот хизмати