Норматив-ҳуқуқий ҳужжатлар лойиҳалари муҳокамаси порталида Президентимизнинг “Ўзбекистон Республикаси Давлат солиқ қўмитаси ҳузурида Фискал институтни ташкил этиш тўғрисида”ги қарори лойиҳаси эълон қилинди.

Унда, Давлат солиқ қўмитаси ҳузурида Фискал институти ташкил этиш белгиланди.

Институтда “Солиқлар ва солиққа тортиш”, “Молиявий назорат ва аудит”, “Солиқ, молия ва тижорат ҳуқуқи”, “Иқтисодиётда ахборот технологиялари” таълим йўналишлари ва мутахассисликлари бўйича кадрлар тайёрланади. Институт тузилмасида Россия Федерацияси Ҳукумати ҳузуридаги Молия университети бўлинмаси (факультети) ҳам ташкил этилади.

Таълим бериш бухгалтерия ҳисоби ва молиявий ҳисоботнинг замонавий усуллари, халқаро солиққа тортиш, трансферт нархларни белгилаш, таваккалчиликларни таҳлил қилиш, бизнес-таҳлил технологиялари (Business Intellegence) ва солиқ маъмурчилигида илғор ахборот технологияларини (Big Data) қўллаш асосида ташкил этилади.

Шунингдек, қарорда Институтни бошқариш Давлат солиқ қўмитаси раиси томонидан амалга оширилиши белгиланди. Илмий ишлар ва инновациялар бўйича проректор лавозимига хорижий мутахассис тайинланади, Давлат солиқ қўмитаси ҳузуридаги Малака ошириш маркази директори эса Институт проректори ҳисобланади.

Бундан ташқари, Институт тузилмасида “Солиқ эволюцияси музейи” ташкил этилади.

Ўзбекистон олий таълим муассасаларига ўқишга қабул қилиш тартиблари асосида 2020/2021 ўқув йилидан қабул бошланади.

Бакалавриат – дастлабки ўқув йили учун бакалавриатга 420 та квота ажратилади. Шундан 130 нафари давлат грантлари асосида қабул қилинади. Бакалаврлар учун таълим муддати уч йил бўлади.

Магистратура – дастлабки ўқув йили учун 26 та квота ажратилади. Шундан, 5 нафари давлат грантлари асосида қабул қилинади. Магистрлар учун таълим муддати бир йил бўлади.

Шунингдек, кундузги бакалавриат таълим йўналишларига мос бўлган йўналишларда табақалаштирилган тўлов-контракт асосида сиртқи таълим шаклида ўқитиш ташкил этиш ҳам белгиланди.

2021 йилдан солиқ соҳасида илмий тадқиқотларни амалга ошириш бўйича таянч докторантура ва докторантурага қабул квоталари ҳам ажратилади.

Институтда давлат грантлари асосида таҳсил олган талабаларга ўқишни тамомлаганидан сўнг, давлат солиқ хизмати органларида камида беш йил ишлаб бериш мажбурияти юклатилади.

Институт профессор-ўқитувчилари ва илмий ходимлари хорижий давлатларнинг етакчи таълим, илмий ва бошқа муассасаларига магистратура ҳамда докторантурада таълим олиш, стажировка ўташ ва малака ошириш учун юборилади.

Институт Тошкент шаҳри, Кичик ҳалқа йўли, 3-уй манзилига жойлаштирилади.

Институтда маъмурий-бошқарув, профессор-ўқитувчи, илмий, ўқув-ёрдамчи, техник ва хизмат кўрсатувчи ходимларни уларнинг меҳнатига ҳақ тўлаш фондидан 85 фоиз миқдоригача бўлган моддий рағбатлантириш махсус жамғармаси (Махсус жамғарма) ташкил этилади.

Қарор лойиҳасида Давлат солиқ қўмитасининг Тошкент солиқ коллежини 2 йиллик инновацион таълим дастурлари асосида ўқитиладиган Институт ҳузуридаги академик лицейга ва Бухоро солиқ коллежини Институт ҳузуридаги техникумга айлантириш белгиланди.

Мазкур қарор лойиҳаси жорий йилнинг 1 апреилига қадар жамоатчилик муҳокамасида бўлади.

ДСҚ Матбуот хизмати