Экспортга ноль даражали қўшилган қиймат солиғи ставкасини қўллаш натижасида ҳосил бўлган 444,7 млрд. сўм миқдоридаги маблағ карантин даврида хўжалик юритувчи субъектлар ҳисобига қайтарилди.
Коронавирус пандемияси сабабли кузатилаётган оғир иқтисодий шароитда Ўзбекистонда тадбиркорлик субъектларини қўллаб-қувватлашга алоҳида эътибор қаратилмоқда. Жумладан, Давлат солиқ қўмитаси товарлар экспортига қўшилган қиймат солиғи (ҚҚС)нинг ноль ставкасини қўллаш натижасида ҳосил бўлган солиқ суммасини тадбиркорлик субъектларига қайтаришнинг тезкор амалиётини йўлга қўйди.
Ҳужжатларни тақдим этиш ва қўшилган қиймат солиғини қайтариш жараёнлари сезиларли даражада соддалаштирилди. Эндиликда солиқ тўловчи ҚҚСни қайтариш учун шахсий кабинети орқали ДСҚга электрон шаклда мурожаат юбориши кифоя.
Карантин тартиби жорий этилган дастлабки кунлардан то 10 майгача ушбу соддалаштирилган механизм асосида жами 228 та солиқ тўловчига 444,7 млрд. сўм қайтарилди. Шундан 300,5 млрд. сўм йирик солиқ тўловчиларнинг маблағлари ҳисобланади. Тошкент шаҳрида фаолият юритаётган тадбиркорлик субъектларига 167,9 млрд. сўм, фарғоналик экспортчиларга эса 107,7 млрд. сўмдан ортиқ маблағ қайтариб берилди.
Таъкидлаш жоизки, айни кунларда тадбиркорлик субъектларига ҚҚСни қайтариш ишлари жадаллик билан давом эттирилмоқда. Мазкур масалада ДСҚга мурожаат йўллаётган экспортчилар сони эса кун сайин ортиб бормоқда.
Эслатиб ўтамиз, ҳисоботида номувофиқликлар аниқланган тадбиркорлик субъектлари хатоларини тузатиб, ҚҚС суммасини қайтариш учун қайта ариза юборишга ҳақли.
ДСҚ Матбуот хизмати.