Soliq organlari va soliq to‘lovchilar o‘rtasidagi munosabatlarda inson omilini cheklab, biznesda ochiqlik va shaffoflikni taʼminlash maqsadida onlayn-NKMlardan foydalanuvchi soliq to‘lovchilar uchun qo‘shilgan qiymat solig‘i va aylanmadan olinadigan soliq hisobotlarining ayrim ko‘rsatkichlarini avtomatik shakllantirish tartibi joriy etildi.
Endilikda, soliq hisobotlarida (QQS va aylanmadan olinadigan soliq) mart oyida realizatsiya qilingan tovarlar summasi onlayn-NKM va virtual kassa maʼlumotlari bo‘yicha yig‘ilishini maʼlum qilamiz.
Shu sababli, joriy yilning mart oyidan onlayn-NKM va virtual kassadan foydalanayotgan soliq to‘lovchilar naqd pul va (yoki) bank plastik kartalari orqali amalga oshirilgan hisob-kitoblar uchun bir tomonlama EHF shakllantirishi talab etilmaydi.
Onlayn-NKM orqali naqd pulda va (yoki) bank plastik (korporativ) kartalari bilan amalga oshirilgan hisob-kitoblar qo‘shilgan qiymat solig‘i (hisob-kitobining 5-ilovasi 6-,7-ustunlari) va aylanmadan olinadigan soliq (hisob-kitobining 1-ilovasi 010-satri) hisobotlari avtomatik shakllanadi.
Joriy yilning yanvar va fevral oylari uchun naqd pulda va (yoki) bank plastik kartalari orqali amalga oshirilgan hisob-kitoblar avvalgidek bir tomonlama shakllantirilgan EHF orqali jamlanadi.
Oflayn (oddiy) NKMdan foydalanuvchilar naqd pul va savdo terminalida bank plastik kartalari orqali hisob-kitoblar bo‘yicha bir tomonlama EHF shakllantirishi shart.
*Tovar (xizmat) lar korporativ karta orqali realizatsiya qilinganda ikki tomonlama EHF ham shakllantirilgan bo‘lsa, sotish summasi ikki marta ko‘payishi mumkin. Bu holatda kamayishga bir tomonlama EHF shakllantirish maqsadga muvofiq.