Koronavirus pandemiyasi tufayli e’lon qilingan karantin davrida Samarqand viloyati davlat soliq xizmati organlari tomonidan ijtimoiy himoyaga muhtoj aholini qo‘llab-quvvatlash bo‘yicha “Saxovat va ko‘mak” umumxalq harakati doirasida keng ko‘lamli ishlar amalga oshirilmoqda.
Jumladan, Ishtixon tumani davlat soliq inspeksiyasiga biriktirilgan 4-sektorda kam ta’minlanganlarni qo‘llab-quvvatlash va ishsiz aholi qatlami bandligini ta’minlashga alohida e’tibor qaratilmoqda.
Hududdagi “Bog‘bon” mahalla fuqarolar yig‘ini, Kavsar qishlog‘idan ajratilgan qariyb ikki gektar yer maydonida “Shijoatli yoshlar davri” qishloq xo‘jaligi kooperativi tashkil etildi. Iqtisodiy ko‘makka muhtoj va ishsiz bo‘lgan 19 nafar kavsarlik aholiga ekin ekish uchun 10 sotixdan yer maydoni ajratib berildi.
Mazkur qishloq xo‘jaligi kooperativi yer maydoniga “Bir mahalla – bir mahsulot” tamoyili bo‘yicha pomidor ko‘chatlari ekildi. Shuningdek, tuman Aholi bandlikka ko‘maklashish markazi bilan hamkorlikda kooperativ a’zolariga 42 million 300 ming so‘mlik subsidiya ajratish bo‘yicha hujjatlar rasmiylashtirildi. Bundan tashqari, kelgusida mazkur kooperativga pomidor ko‘chatlari yetkazib berish maqsadida qishloqda istiqomat qiluvchi 7 ta kambag‘al oilaga 0,5 sotixli issiqxona qurish uchun subsidiya ajratishga dastlabki hujjatlar rasmiylashtirildi.
– Bizga yer maydoni ajratilib, ekish uchun ko‘chatlar berildi, – deydi Dilbar Shernazarova. – Bu iqtisodiy ahvolimizni yaxshilash uchun imkoniyatdir.
Samarqand viloyati DSB Matbuot xizmati