Сирдарёда давлат солиқ хизмати органлари ходимларидан иборат махсус ишчи гуруҳлар вилоятдаги туман ва шаҳар ҳудудларидаги мавжуд 12 та деҳқон бозори, 312 та дорихона ҳамда 3 минг 145 та чакана савдо субъектларида нарх-навонинг сунъий оширилишини олдини олиш бўйича мониторинг тадбирлари ўтказмоқда.
Мониторинг тадбирлари давомида ишчи гуруҳлари жойлардаги савдо объекти раҳбари ва сотувчиларидан коронавирус шароитида нархларни оширмаслик ҳақида кафолат хатлари олиш баробарида улар билан профилактик суҳбатлар ўтказмоқда.
Шунингдек, ишонч телефони орқали келиб тушаётган нарх-навонинг сунъий оширилганлиги ва бошқа шу билан боғлиқ мурожаатлар юзасидан ўрганиш ўтказилиб, муаммолар жойида қаноатлантирилмоқда. Тушунтириш ва профилактик суҳбатлардан тўғри хулоса чиқармаган озиқ-овқат маҳсулотларини сотувчи ноқонуний тадбиркорлик субъектларини аниқлаш юзасидан назорат тадбирлари ўтказиш ва қонуний чора кўриш ишлари ташкил этилмоқда.
Буларнинг барчаси нархларнинг барқарор бўлиши ва аҳолининг харид қобилиятини бир маромда бўлишини таъминлашга қаратилган чора-тадбирларнинг узвий давомидир.
Юқоридагилар билан бирга дорихоналарда антисептик воситалар ҳамда тиббий ҳимоя ниқобларини белгиланган нархда ва ҳеч қандай тўсиқларсиз сотилиши ҳам алоҳида назоратга олинди.
Тарғибот ва назорат тадбирлари давом эттирилмоқда.
Сирдарё вилояти ДСБ
Матбуот хизмати