Honam universiteti (Janubiy Koreya) va Toshkent soliq texnikumi o‘rtasida Xalqaro hamkorlik memorandumi imzolandi. Unda Toshkent soliq texnikumi bitiruvchilari Honam universitetining tegishli yo‘nalishlarida imtiyozli ravishda bir yo‘la 3-kursdan o‘qishga qabul qilinishi nazarda tutilgan.
Malakali kadrlarni tayyorlash – bu soliqlar va soliqqa tortish sifatini oshirish va sohani istiqbolli rivojlantirishning eng muhim jihatidir.
Davlat soliq qo‘mitasining Toshkent soliq kolleji O‘zbekiston Prezidentining 2020-yil 4-noyabr PQ-4879-son qarori bilan Davlat soliq qo‘mitasi Fiskal instituti xuzuridagi Toshkent soliq texnikumi etib qayta tashkil etildi.
Hozirgi kunda Texnikumda jami 413 nafar o‘quvchi taʼlim olmoqda. Shulardan 280 nafari bitiruvchi. Ularning har biri mahalliy OTMlardagi kabi xorij universitetlarida taʼlimni davom ettirish imkoniga ega. Masalan, 2+2 shartnomasi doirasida Janubiy Koreya davlatining Honam universitetida tahsil olishi mumkin.
Yaqinda Honam universiteti va Toshkent soliq texnikumi o‘rtasida xalqaro hamkorlikning navbatdagi bosqichi – onlayn uchrashuv bo‘lib o‘tdi.
Honam universiteti rektori janob Pak Sangchol talabalarni o‘qish va ish bilan taʼminlashda har tomonlama qo‘llab-quvvatlashga tayyorligini bildirdi.
Natijada Honam universiteti va Toshkent soliq texnikumi o‘rtasida xalqaro hamkorlik memorandumi imzolandi. Unda Toshkent soliq texnikumi bitiruvchilari Honam universitetida taʼlimni davom ettirishi nazarda tutilgan.
Uchrashuvda ikki tomonlama samarali hamkorlik, tajriba almashish, kelgusida IT texnologiyalari sohasida kadrlar tayyorlash masalalari muhokama qilindi.
DSQ Matbuot xizmati