Davlat soliq xizmati organlari tomonidan “Soliqchi – ko‘makchi” tamoyili doirasida amalga oshiriladigan ishlar samaradorligini taʼminlash va kelgusidagi rejalarni belgilab olish maqsadida 4 bosqich va 9 ta yo‘nalishda tadbirkorlarga tizimli ko‘mak ko‘rsatish yo‘lga qo‘yilgan.
“Harakatlar rejasi”ga muvofiq 2021-yilning yanvar-avgust oylarida 155 382 ta tadbirkorlik subyektiga amaliy yordam berildi.
Jumladan, “Soliqchi – ko‘makchi” tamoyili doirasida soliq turlari bo‘yicha 31 135 ta subyektning 3,4 trln. so‘m mavjud ortiqcha to‘lov summasi qaytarib berildi (shundan, 7 514 tasiga 2,9 trln. so‘m QQS qaytarildi).
3 141 ta subyektning 26,6 mlrd. so‘mlik soliq majburiyatlari ularning debitor qarzdorliklari hisobidan undirilishi hal etildi.
Vaqtinchalik moliyaviy qiyinchilikka uchragan 509 ta korxonaning 39,5 mlrd. so‘m soliq qarzi to‘lov muddatlari uzaytirildi.
Ortiqcha xarajatlar va qonun buzilishlaridan saqlash maqsadida 54,7 mingta tadbirkorga hisobot to‘ldirish va topshirishga ko‘maklashildi.
Faoliyat turidan kelib chiqib, 7,5 mingta yangi ish boshlagan tadbirkorlik subyektiga optimal soliq rejimini tanlashda amaliy yordam ko‘rsatildi.
Shuningdek, 8,4 mingta tadbirkorga mavjud soliq imtiyozlaridan foydalanish tartibi yuzasidan tushunchalar berildi.
Soliq qarzi to‘g‘risida maʼlumot so‘rab murojaat qilgan 12 mingta, shaxsiy kartochkadan ko‘chirma so‘rab murojaat qilgan 6,4 mingta tadbirkorlik subyektlariga maʼlumotnoma taqdim etildi.
Tadbirkorlik subyektlariga soliq organlari faoliyatiga bog‘liq bo‘lmagan holatlar yuzasidan ham yordam berilmoqda. Xususan, aylanma mablag‘ga muhtoj bo‘lgan 1 278 ta xo‘jalik subyektiga 224,5 mlrd. so‘m kredit olinishiga ko‘maklashildi. Bundan tashqari, 414 ta tadbirkorlik subyektiga soliq organlari tashabbusi bilan yer va binolar ajratildi.
Soliq organlarining elektron davlat xizmatlari portali – my.soliq.uzda “Soliqchi-tadbirkorga ko‘makchi” platformasi joriy etilgan. Aprel-avgust oylarida portal orqali kelib tushgan murojaatlar bo‘yicha 116 ta holatda tadbirkorlarning muammolari ijobiy hal etildi.