Bu esa yashirin iqtisodiyot ulushi kamayib, erkin va teng raqobat muhiti shakllanishida muhim rol o‘ynamoqda.
Shu bilan birga yashirin iqtisodiyotning shakllanishiga olib keladigan sabablar, omillar va firibgarlik sxemalari aniqlanib, ularni bartaraf etish choralari ko‘rib kelinmoqda.
Natijada ayrim subyektlar o‘rtasida amalga oshirilayotgan operatsiyalar ularning faoliyat turi va xususiyatlariga to‘g‘ri kelmasligi, tovarlar (xizmatlar) nomenklaturasi nomuvofiq bo‘lgan holatlar aniqlanmoqda.
Hozirda faoliyatida bunday holatlar aniqlangan 789 ta subyekt to‘lanishi lozim bo‘lgan QQS summalarni kamaytirish tarzidagi huquqni suiisteʼmol qilgan korxonalar ro‘yxatiga kiritildi.
Ularning aksariyati haqiqatda xarid qilinmagan yuqori likvidli mahsulotlarni naqd pul ko‘rinishida realizatsiya qilgan.
Misol uchun, hujjatda televizor, muzlatkich, kir yuvish mashinasi kabi maishiy texnikalar xarid qilinganini qayd etib, aslida qurilish mollari mahsulotlari savdosi bilan shug‘ullangan.