Вилоятимизнинг барча ҳудудларида қурилиш-бунёдкорлик ишлари давом этмоқда. Зарбдор туманида ҳам Давлат солиқ инспекцияси биносининг фойдаланишга топширилиши туман ижтимоий-иқтисодий ҳаётида муҳим воқеа бўлди. Кеча туман фаоллари иштирокида инспекция биносининг очилиш маросими бўлиб ўтди.
Янги бино, янги шароитлар иш унумдорлигини ошириш, айниқса, бюджет даромадларини таъминловчи солиқ тизими ишини самарали ташкил этишда катта ҳамиятга эга. Янги барпо этилган Давлат солиқ инспекцияси туман марказида қад ростлади.
Мазкур бино “Евроспортстрой” масъулияти чекланган жамияти қурувчилари томонидан бунёд этилди. Уни жиҳозлашда солиқ тўловчилар учун қулайлик яратиш орқали “Солиқ идоралари – тадбиркорга кўмакчи” тамойилининг амалдаги ифодасини акс эттиришга эътибор қаратилди.
Зарбдор туманига хос бўлган прогноз кўрсаткичлари йил бошидан буён режага нисбатан ошириб бажарилмоқда. III чорак мобайнида бюджетга жами тушум 14 116,6 млн. сўм (116%) ни ташкил этган. Йил бошидан буён 43 377,1 млн. сўм тушум ўрнига 47 489,1 млн. сўм (109%) тушум таъминланди.
Натижада ДСИ жамоаси рағбатлантиришга муносиб деб топилди ҳамда 2020 йил 9 ойлик якунига кўра, Зарбдор туман Давлат солиқ инспекциясига хизмат автомобили топширилди. Шунингдек, Арнасой, Ғаллаорол, Пахтакор, Янгиобод ва Жиззах шаҳар ДСИ ларга ҳам “Nexia-3” хизмат автомобиллари топширилди.
Айни кунда Шароф Рашидов, Зафаробод ва Янгиобод ДСИлари учун янги бино қурилиши ва жиҳозлаш ишлари давом этмоқда. Йил якунига қадар мазкур биноларнинг фойдаланишга топширилиши режалаштирилган.
Жиззах вилоят ДСБ Матбуот хизмати