Юридик ёки жисмоний шахслар Давлат солиқ қўмитаси Рўйхатга олиш марказининг давлат хизматлари расмий веб-сайти https://e-imzo.uz дан фойдаланган ҳолда ЭРИ олиши мумкин.
Солиқ тўловчи (жисмоний шахс)ларнинг идентификация рақамини (СТИР) беришни бекор қилиш муносабати билан солиқ тўловчиларни солиқ органларида рўйхатга олиш ЖШШИР – жисмоний шахснинг шахсий идентификация рақами орқали амалга оширилади (ПҚ-6191, 23.03.2021 йил).
Электрон шакл тўлдирилиши лозим. Жисмоний шахс тегишли ойнада белгиланган қаторга 14 рақамдан иборат ЖШШИРни ва бошқа сўралган маълумотлар ва файлларни (телефон рақами, паспорт маълумотлари ва бошқалар) киритади.
Юборилган анкета давлат хизматлари маркази оператори томонидан 1 иш куни ичида кўриб чиқилади. https://e-imzo.uz сайтида «Аризани қидириш» бўлими орқали ариза ҳолатини текшириш мумкин. ЭРИ сертификатини беришда ижобий қарор қабул қилинган тақдирда, аризачи томонидан киритилган телефон рақамига SMS-хабар юборилади.
e-imzo.uz сайтида ЖШШИР орқали электрон рақамли имзо (ЭРИ) калити сертификатини бериш бўйича босқичма-босқич қўлланма билан ушбу ҳаволада танишишингиз мумкин. https://dls.yt.uz/e-imzo/instruction_online_ecp_uz.pdf
ЭРИ олиш учун тўлов жисмоний шахслар учун базавий ҳисоблаш миқдорининг 7 фоизини, юридик шахслар учун 10 фоизини ташкил этади. Тўлов мавжуд бўлган ҳар қандай усулда амалга оширилиши мумкин.
Замира Усмонова,
ДСҚ ҳузуридаги «Янги технологиялар» ИАМ Фойдаланувчиларни техник қўллаб-қувватлаш бўлими етакчи мутахассиси.