O‘zbekiston Respublikasi Vazirlar Mahkamasi huzuridagi Soliq qo‘mitasi

Ҳамкорликнинг янги босқичи

29/04/2024

Жорий йилнинг 25-26 апрель кунлари Россия Федерал солиқ хизмати раҳбари ўринбосари В.Колесников бошчилигидаги делегация Солиқ қўмитасига ташриф буюрди.

Ташрифдан кўзланган мақсад – солиқ солиш мақсадларида маълумотлар базасидан фойдаланиш ва ушбу жараёнларни тартибга солувчи қонунчилик нормалари ҳамда бошқа масалаларда Ўзбекистон тажрибаси билан танишиш.

Ташриф доирасида Солиқ қўмитаси Раисининг биринчи ўринбосари M.Mирзаев ва В.Колесников ўртасида икки томонлама кенгайтирилган учрашув бўлиб ўтди. Учрашувда амалдаги ҳамкорлик ҳамда яқин келажакдаги истиқболли режалар муҳокама қилинди.

Шунингдек, делегация аъзолари қўмитада ташкил этилган замонавий ахборот-технологиялари ва илғор дастурий таъминотлар, хусусан, Солиқ маълумотларини қайта ишлаш маркази фаолияти билан яқиндан таништирилди.

Меҳмонлар учун Солиқ қўмитасининг солиқ тўлашдан бўйин товлаш хавфларини назорат қилиш тизими – СRМ, «Автокамерал» дастурий таъминоти, жисмоний шахснинг шахсга доир маълумотлари базаси, шу жумладан, биометрик маълумотларнинг юритилиши, солиқ ҳисоботларини автоматлаштириш бўйича тақдимотлар намойиш этилди.

Ўз навбатида, меҳмонлар томонидан Россия Федерал солиқ хизмати тизимлари (“Шаффоф бизнес”, ФИАС, РМСП, ЗАГС, ЕРН) ва Маҳсулотлар (товар ва хизматлар) ягона электрон миллий каталоги дастурий маҳсуллари тўғрисида тақдимотлар қилинди.

Бўлиб ўтган учрашувлар якунида икки томонлама ҳамкорликни янада самарли ташкил этишга келишиб олинди.

Халқаро солиқ муносабатлари бошқармаси