“Mening holatimni tekshirish” xizmatida soliq hisobotlarini o‘z vaqtida va to‘g‘ri topshirish mazmunida ikkita alohida mezon mavjud. Ushbu meʼzonlarda qizil yoki sariq belgi paydo bo‘lsa, qanday oqibatlarga olib keladi, ularni yashil holatga qanday o‘tkazish lozim?
Soliq to‘lovchilar biron bir soliq turi bo‘yicha hisobotlarni o‘z vaqtida taqdim etmaganda “Soliq hisobotlarini taqdim etmaslik” mezonida qizil belgi paydo bo‘ladi. (VM-595-son, 1-ilova, 16-band. 22.04.2021)
Bu soliq xavfining yuqori darajasi hisoblanadi va QQS to‘lovchilarini soliq organlarida qo‘shilgan qiymat solig‘i bo‘yicha maxsus ro‘yxatdan o‘tkazish tartibi to‘g‘risidagi Nizomga muvofiq QQS guvohnomasi berishni rad etish yoki mavjud guvohnomasini vaqtincha to‘xtatib turish uchun asos bo‘ladi (VM-595-son, 1-ilova, 31-band. 22.09.2021).
Ushbu mezonda yashil belgi paydo bo‘lishi uchun barcha soliq hisobotlarini Soliq kodeksi meʼyorlariga muvofiq topshirish kerak.
Bunda, “Oxirgi o‘n ikki oy ichida soliq hisobotlarini o‘z vaqtida taqdim etmaslik holatlari mavjud bo‘lganligi” mezonida sariq belgi bo‘ladi.
“Oxirgi o‘n ikki oy ichida soliq hisobotlarini o‘z vaqtida taqdim etmaslik holatlari mavjud bo‘lganligi” mezoni soliq xavfining o‘rta darajasi hasoblanadi (VM-595-son, 1-ilova, 17-band. 22.09.2021).
Soliq to‘lovchilar oxirgi 12 oy ichida soliq hisobotlarini kechikib topshirganda mazkur mezonda yashil belgi paydo bo‘lmasligi mumkin.
Soliq xavfining o‘rta darajasi omillari mavjud bo‘lgan soliq to‘lovchilarga hech qanday cheklovlar qo‘yilmaydi. Ammo kelgusi 12 oy ichida davlat soliq xizmati organlari tomonidan nazorat tadbirlari o‘tkazilishini inobatga olish lozim. (VM-595-son, 1-ilova, 20-band. 22.09.2021).