Солиқ қўмитаси Раисининг

коррупцияга қарши курашиш бўйича

М У Р О Ж А А Т И

Тарихдан маълумки коррупциянинг пайдо бўлиши инсониятнинг узоқ ўтмишига бориб тақалади. Узоқ ўтмишга эга бўлган бу иллатни бартараф этиш ҳам улкан жасорат ва садоқатни талаб этади.

Ҳурматли Президентимиз ташаббуси билан “Инсон қадри учун” тамойили асосида амалга оширилаётган инсон ҳуқуқлари ва манфаатларини сўзсиз таъминлаш ҳамда фаол фуқаролик жамиятини шакллантиришга қаратилган ислоҳотлар доирасида барча соҳаларда коррупцияга қарши муросасиз муносабатда бўлиш муҳитини шакллантириш талаб этилади.

Бунинг учун коррупциянинг ҳар қандай кўринишига муросасиз муносабатда бўлиш солиқ хизмати органлари тизимида ҳар бир ходимнинг кундалик ҳаёт тарзига айланиши керак. Ҳалоллик, ватанпарварлик ва масъулиятни фаолиятининг асосий тамойилига айлантирган ҳолда, берилган вазифаларни виждонан, холис ва юқори савияда амалга ошириши лозим.

Шу нуқтаи назардан, тизимда коррупциянинг олдини олиш чораларини кўриш, уни келтириб чиқариши мумкин бўлган сабаб ва шароитларни барвақт аниқлаш ва бартараф этиш бўйича самарали тизим шакллантирилмоқда.

Коррупцияга қарши курашиш, унинг олдини олиш, коррупцияга қарши хавф-хатарларни баҳолашда очиқлик ва шаффофликни таъминлаш, жараёнга илғор механизмларини жорий этиш, бу борада ҳуқуқий ва институционал базани такомиллаштириш солиқ органининг асосий мақсадлари этиб белгиланган.

Ўтган даврда автоматлаштириш орқали солиқ маъмурчилигини тўлиқ ва ўз вақтида амалга ошириш, функциялар бўйича вертикал назорат ўрнатиш, коррупцион ҳолатлар юзага келишини чеклаш, маълумотларнинг реал вақт режимида ва бехато шакллантириш йўналишларида тизимли ишлар амалга оширилди.

Солиқ тўловчиларни ҳисобга олишдан тортиб, то солиқ мажбуриятини бажаришгача бўлган жараёнларнинг автоматлаштирилиши солиқ тўловчилар ва солиқ органлари ўртасидаги ўзаро муносабатларда инсон омилини чеклаб тизимни янада шаффофлашишига замин яратмоқда.

Умуман, бугунги кунда солиқ тўловчиларга 50 дан ортиқ интерактив хизматлар кўрсатилмоқда. Сўнгги бир йилда амалиётга яна 9 та янги интерактив хизмат татбиқ этилди.

Амалга оширилган ишлар натижаси ўлароқ, Солиқ қўмитаси 2021 йилда “ISO 37001:2016 коррупцияга қарши курашиш менежменти” халқаро стандартларга мувофиқлик сертификатини қўлга киритди.

Солиқ органлари коррупцияга қарши курашиш ва коррупциявий ҳолатларнинг барвақт олдини олишда жамоатчилик назоратига таянади ва фуқароларнинг фаоллиги ва ташаббусларини қўллаб-қувватлайди.

Солиқ хизмати органлари ходимларининг коррупция ва бошқа ҳуқуқбузарлик ҳолатларига алоқадорлиги юзасидан маълумотларга эга бўлган фуқаролар Солиқ қўмитасининг 71-244-98-98 рақамли Ишонч телефони ёки dsq_anticorrupciya_bot телеграм боти орқали тўғридан-тўғри мурожаат йўллаши мумкин.

Солиқ хизмати органларида коррупциянинг олдини олиш чораларини кўриш, келиб чиқиш сабаб ва шароитларини барвақт аниқлаш ва бартараф этиш борасидаги ишлар келгусида ҳам изчиллик билан давом эттирилади.

Шу ўринда тизимда меҳнат қилаётган ҳар бир раҳбар ва ходимни коррупция ҳолатларининг ҳар қандай кўринишларига нисбатан муросасиз муносабатда бўлишга ҳамда ўз хизмат вазифаларини ҳалол ва холис бажаришга чақирамиз.