Muzey haqida

«Soliqlar tarixi muzeyi» O‘zbekiston Respublikasi Davlat soliq qo‘mitasi Raisining tashabbusi bilan Axborot xizmati tomonidan barpo etilgan hamda 2007 yil 24 mart kuni foydalanishga topshirilgan.

Mazkur muzeydagi eksponatlar davriyligi va mazmuniga mos ravishda 8 bo‘limga ajratilgan. «Qadimgi tarix va an’analar» deb atalgan birinchi bo‘limda - soliq va soliq solishning ilk unsurlari yoritilgan bo‘lsa, ikkinchi bo‘limida buyuk sarkarda Amir Temur hukmronligi davrida mavjud bo‘lgan soliq siyosati haqida ma’lumotlar berilgan.

Muzeyning «Rivojlanish va islohotlar davri» deb atalgan bo‘limidan mustaqil O‘zbekiston Respublikasining davlat soliq tizimi faoliyati, soliq organlari tomonidan keng jamoatchilik orasida olib borilayotgan targ‘ibot ishlari, xalqaro munosabatlar, Davlat mukofotlariga sazovor bo‘lgan soliq xizmati xodimlari, shuningdek, soliq organlarining moddiy-texnik bazasini yaxshilash borasida olib borilayotgan sa’y-harakatlar haqidagi ma’lumotlar joy olgan.

Muzey markazida qadimgi soliq xizmati xodimining xizmat kiyimlari hamda ish qurollarini, shuningdek O‘zbekiston Respublikasi davlat soliq xizmati xodimining hozirgi kundagi xizmat kiyimlari nushalarini tomosha qilish mumkin.

Muzeyda joylashtirilgan monitor yordamida esa, O‘zbekiston Respublikasi Prezidentining mustaqillik yillarida davlat soliq xizmatini tashkil etish, uning davlatchilikdagi, xalq turmush farovonligini oshirishdagi o‘rni, soliq xizmatining istiqbollari xususidagi ma’ruzalarini tomosha qilib, tinglash imkoniyati mavjud.

Davlat soliq qo‘mitasining «Soliqlar tarixi muzeyi» eksponatlari soni yildan-yilga ortib, mazmunan kengayib bormoqda.

Oʼzbekiston Respublikasi davlat soliq qoʼmitasi muzeyi