Yangilangan mobil ilova

 2024-yil 1-avgustda “Soliq” mobil ilovasining to‘liq yangilangan mutlaqo yangi interfeysga ega 2.0.0 versiyasi foydalanuvchilarga taqdim etildi.

Ushbu versiyada ikkita yangi xizmat “Soliq biznes” va “Barqarorlik reytingi” xizmatlari joriy qilindi.

“Soliq biznes” – Yuridik shaxslar va yakka tartibdagi tadbirkorlar uchun mobil shaxsiy kabinet, ushbu xizmat orqali foydalanuvchilar moliyaviy operatsiyalar va boshqa biznes aspektlari haqida ma’lumot olishlari mumkin.

Xizmatdan foydalanish uchun korxona rahbari va bosh hisobchisi Face ID orqali ro‘yxatdan o‘tadi.

- Birinchi sahifada quyidagilar ko‘rinadi:
- korxona nomi;
- STIR;
- barqarorlik reytingidagi o‘rni;
- soliq majburiyatlari holati (bajarilgan yoki bajarilmagan).

Keyingi bo‘lim – korxonaning iqtisodiy faoliyatiga tegishli asosiy muammolar, savollar va ma’lumotlarni o‘z ichiga oladi. Ular “DSB ma’murchiligi” va “Mahallabay” ishlash tizimidagi mezonlar asosida aks ettiriladi. Masalan: soliq hisobotlari, hisoblangan soliqlar va yig‘imlar, bank hisob raqamlari, EHF, elektron ishonchnoma va shartnomalar holati. Bunda hisob raqam to‘xtatilish sababi ham ko‘rsatiladi. Misol uchun, soliq hisobotlarini o‘z vaqtida taqdim etmaslik, kameral natijalari bo‘yicha talabnomaga javob bermaslik, soliq to‘lovchi o‘zi ko‘rsatgan manzilda bo‘lmasligi...

Shaxsiy kabinetga yuborilgan talabnoma va boshqa yozishmalar alohida kichik bo‘limda jamlangan. Bu yerdan soliq organiga murojaat yuborish imkoniyati ham yaratildi.

Biznes jarayonlarini va buxgalterlar faoliyatini korxona rahbari bilan bir paytda ta’sischilar, biznes hamkorlar va boshqa ishonchli shaxslar ham kuzatib borishi mumkin. Buning uchun korxona rahbari kuzatuvchi rejimini faollashtirishi kifoya.

Soliq to‘lovchilar o‘ziga biriktirilgan soliq inspektori bilan to‘g‘ridan-to‘g‘ri aloqa o‘rnatib, ularning faoliyatiga salbiy yoki ijobiy baho berish mumkin.

“Barqarorlik reytingi” – ushbu xizmat orqali foydalanuvchilar o‘zlariga tegishli yoki shartnomaviy munosabatlarga kirishmoqchi bo’lgan yuridik korxonalarining barqarorlik reyting ko’rsatkichlari to‘g‘risida ma’lumot olishlari mumkin.

Mobil ilovani keyingi 2.0.1, 2.0.2, 2.0.3 versiyalarida ilovaning barqaror va qulay ishlashi uchun yuzaga kelgan xatoliklar bartaraf etilib, foydalanuvchilar e’tiboriga havola etildi.

2024-yil 17-oktabr sanasida ilovaning yangi 2.0.4 versiyasi ishlab chiqildi. Ushbu versiyada ham ilova foydalanuvchilari uchun bir nechta foydali funktsiyalar va yaxshilanishlar joriy qilindi, Jumladan:

-         “Push-xabarnomalar va yangiliklar” funktsiyasi qo‘shildi. Endilikda foydalanuvchilar barcha muhim voqealarni va yangiliklarni o‘tkazib yubormaydilar, ushbu funktsiya orqali barcha foydalanuvchilar o‘zgarishlardan xabardor bo‘lishlari mumkin.

-                   “Rezidentlik sertifikati”, “Komissioner shakllantirish” va “Soliq to‘lovchi ma’lumotlari” xizmatlari yangi dizaynga ega bo‘ldi.

“Soliq” mobil ilovasining yangi 2.0.5 versiyasi 2024-yil 15-noyabr sanasida foydalanuvchilar uchun taqdim etildi. Ushbu versiyada yangi “Mening uyim” xizmati ishga tushirildi. Shuningdek, “Xabar yuborish”, “Soliq imtiyozlarini qaytarish” va “Ijaraga berish” xizmatlari dizayni yangi ko‘rinishga ega bo‘ldi.

“Soliq” mobil ilovasining “Mening uyim” xizmati orqali foydalanuvchilar barcha kommunal va boshqa xizmatlarni kuzatib borish va to‘lash, shuningdek, “Avtoto‘lov” va “Xabarnoma” xizmatlarini o‘rnatishlari mumkin.

Buning uchun yangi foydalanuvchilar Face ID avtorizatsiyasidan oʻtishlari kerak.

Agar fuqarolarning egaligida ko'chmas mulki bo'lsa, barcha obyektlar avtomatik ravishda aks ettiriladi.

Boshqa kvartira yoki uyni mustaqil ravishda qo'shishlari mumkin.

“Mening uyim” xizmati orqali:

- elektr energiyasi;

- tabiiy gaz;

- sovuq suv;

- issiq suv;

- maishiy chiqindilarni olib ketish;

 - internet;

- shahar telefoni aloqasi uchun to'lovlarni amalga oshirish mumkin.

Buning uchun bir marta quyidagi ma'lumotlarni kiritish kerak:

- shaxsiy hisob raqam,

- kompaniya provayderi;

- shahar telefon raqami;

- bank kartasi (agar oldin qo'shilmagan bo'lsa).

Shuningdek, qarzdorlik holati kuzatilganda “Mening uyim” bo‘limining asosiy oyna qismida “Qarz” yozuvi orqali xabardor bo‘lish imkoniyati mavjud.

To'lov haqidagi ma'lumotlar “To'lovlar monitoring” oynasida saqlanadi

“Soliq” mobil ilovasining yangi 2.0.7 versiyasi ilova foydalanuvchilari uchun taqdim etildi.

“Soliq” mobil ilovasining yangilangan versiyasida biznes jarayonlarini optimallashtirish uchun “Soliq biznes” bo‘limida direktorlar (buxgalterlar)ga 2 ta yangi xizmat yaratildi.

- Umumiy ovqatlanish korxonalari uchun jismoniy shaxslardan qishloq xo'jaligi mahsulotlarini naqd pulga xarid qilish dalolatnomasini onlayn rasmiylashtirish;

- Turoperator va mehmonxona xizmatlari ko'rsatuvchi korxonalar uchun QQSni qaytarish bo'yicha ariza yuborish imkoniyatlari taqdim etildi.

Yana bir yangilik – “Ijaraga berish” xizmatini “Ko‘chmas mulk ijarasini rasmiylashtirish” bo‘limida birga yashovchilarni qo‘shish imkoni yaratildi.

2024-yilda “Soliq” mobil ilovasi foydalanuvchilari soni 3 565 146 taga oshib hozirda mobil ilovaning umumiy foydalanuvchilari soni 9 231 516 nafarni tashkil qilmoqda.  

Ilova orqali soliq xizmatiga savol berishingiz yoki “Davr-On” virtual yordamchisiga murojaat qilishingiz mumkin.