O‘zbekiston Respublikasi Vazirlar Mahkamasi huzuridagi Soliq qo‘mitasi

Davlat soliq qo‘mitasi rahbariyati tadbirkorlar bilan uchrashdi

26/11/2021

Kecha Davlat soliq qo‘mitasi raisi Sherzod Kudbiyev boshchiligidagi maxsus ishchi guruhi hududlarda faoliyat yuritayotgan tadbirkorlik subyektlari bilan konstruktiv muloqotlar o‘tkazishi haqida xabar berilgan edi.

Ushbu uchrashuvlar doirasida bugun, 26-noyabr kuni Davlat soliq qo‘mitasi raisi o‘rinbosari Jahongir Abdiyev va qo‘mita markaziy apparati department direktorlari Namangan viloyatidagi tadbirkorlik subyektlari bilan yuzma-yuz muloqot o‘tkazdi.

Uchrashuv avvalida, soliq yukini kamaytirish va soliq maʼmurchiligi samarasini oshirish orqali tadbirkorlarga yaratilayotgan sharoitlar, xususan, Vazirlar Mahkamasining 2021-yil 22-sentabrda qabul qilingan 595-son qaroriga muvofiq tatbiq etiladigan qo‘shilgan qiymat solig‘i to‘lovchilarini ro‘xatga olishning yangi tartiblari haqida batafsil tushuntirishlar berildi.

Mutaxassislar mazkur tartiblarni amaliyotga joriy etish doirasida yaratilgan dasturiy mahsullar “E-ijara”, “E-aktiv” interaktiv xizmatlari hamda yangilangan EHF va MXIK tizimlarining ishlash jarayonlarini taqdimotlar orqali tushuntirib berdi.

Tadbirkor muammosini hal etishda soliqchi unga ko‘makchi bo‘lsa, uning savdo aylanmasi ko‘payadi, ish o‘rinlari ortadi, fuqarolar muqim ish bilan taʼminlanadi, aholi turmush farovonligi yuksaladi. Shu nuqtai nazardan tashkil etilgan muloqotlarda Davlat soliq qo‘mitasi rahbariyati tomonidan tadbirkorlarning taklif va mulohazalari tinglandi. Tadbirkorlik faoliyati davomida uchrayotgan muammolar o‘rtaga tashladi.

Davlat soliq qo‘mitasi rahbariyati tomonidan tadbirkorlar muammolarining ijobiy yechimi yuzasidan aniq ko‘rsatma va amaliy yordamlar berildi. Ularning takliflari o‘rganib chiqilishi va qonunchilik doirasida amaliyotga tatbiq etish bo‘yicha choralar ko‘rilishi aytildi.