kirill alifbosida o‘qish

Bugun, 22-oktabr kuni Davlat soliq qo‘mitasi yutuqli chek o‘yinlari IV tirajining barcha g‘oliblariga o‘z sovrinlari topshirildi.

Eslatib o‘tamiz, bir hafta avval (14.10.2020 yil) yutuqli chek o‘yinlarining IV tirajida Chevrolet Nexia 3 avtomobili va boshqa qimmatbaho sovg‘alar g‘oliblari jonli efirda aniqlangan edi. Ushbu tirajda Toshkent shahridagi savdo nuqtalariga o‘rnatilgan onlayn nazorat-kassa mashinalari va virtual kassalardan berilgan 45 mingdan ziyod chek ro‘yxatdan o‘tkazildi. Ular orasidan 20 nafar omadli chek sohibi aniqlangan edi.

Yutuqli chek o‘yinlarini o‘tkazish haqidagi nizomga ko‘ra, jonli efirdan so‘ng har bir sovrindorga g‘olib bo‘lganligi haqida SMS xabarnoma yuborildi. Sovrinlar shakli buzilmagan yutuqli chekning asl nusxasini taqdim etganlarga berildi.

Muhim: yutuqli chek o‘yinlari insonlarga quvonch ulashish bilan bir qatorda, iste’mol va savdo madaniyatini oshirish va yashirin iqtisodiyot ulushini qisqartirishga xizmat qilmoqda. Iste’molchilarga fuqarolik pozisiyasini namoyish etish va huquqlarini himoya qilish ko‘nikmasini shakllantirishga yordam beryapti.

Gʻoliblar hissiyotlari bilan o‘rtoqlashamiz

Natalya Zaxarkevich, iqtisodiyot sohasi mutaxassisi (velosiped sohibi): 

– Aslida lotereya o‘yinlariga unchalik ahamiyat bermasdim. Keyingi oylarda AYOQSH, dorixona va boshqa savdo hamda xizmat ko‘rsatish shoxobchalarida onlayn kassa cheklari berish odat tusiga kirib bormoqda. Bu, ushbu noodatiy o‘yinda omadimni sinab ko‘rishimga sabab bo‘ldi.

O‘yinni jonli efirda tomosha qilishni boshlaganimda, birinchi yutuq menga chiqdi. Bu – haqiqiy omad! Avvaliga bunga ishonolmadim, ammo g‘oliblar ro‘yxati rasman e’lon qilingandan so‘ng, judayam xursand bo‘ldim. Gʻolib bo‘lishimdan avval menga ko‘pchilik ishonmagan edi. Endi esa do‘stlarim ham, qarindoshlarim ham yutuqli chek o‘yinlarida ishtirok etish uchun cheklarni ro‘yxatdan o‘tkazishni boshlab yuborgan. Hammasidan ham o‘g‘lim velosipeddan xursand! 

Otabek Yusupov, madaniyat va san’at sohasi mutaxassisi (televizor sohibi): 

– Yutuqli o‘yinlar haqida uyimiz yonida joylashgan dorixonadagi stirekdan bildim. Qo‘llanmada ko‘rsatilganidek SOLIQ mobil ilovasini yuklab olib, cheklarning QR kodini skaner qilishni boshladim. Telefonimga televizor sohibi bo‘lganim haqida SMS kelganda xuddi yosh boladek xursand bo‘ldim. Bu mening hayotdagi ilk yutug‘im bo‘ldi.

Go‘zal Abdurahmonova, Sergeli mehmonxona xo‘jaligi kasb-hunar kolleji bitiruvchisi (kondisioner g‘olibi): 

– Lotereya chiptalarini sotib olish yoki qandaydir kuponlarni to‘ldirish o‘rniga yana qaysi o‘yinda cheklar bilan ishtirok etish mumkin?! Turli savdo nuqtalaridan berilgan xarid cheklari uchun qimmatbaho sovrinlar berilmoqda. Men bor yo‘g‘i besh dona chekni ro‘yxatdan o‘tkazgan edim. Ko‘proq chekni ro‘yxatdan o‘tkazish g‘olib bo‘lish imkoniyatimni oshirishi haqida o‘ylamagandim ham. Yutib olgan kondisionerni yangi uyimizga o‘rnatamiz va u mening omadli ekanligimni eslatib turadi.

Erkinxonov Saidolimxon, talaba (avtomobil sohibi): 

– Yutuqli chek o‘yinlariga mendan ko‘ra, singlim ko‘proq qiziqdi va meni o‘yinda ishtirok etishga undadi. Telefonimga SOLIQ mobil ilovasini yuklab oldim va ikkita chekning QR kodini skaner qildim.

Gʻolib bo‘lganim haqida bilganimdan so‘ng, xushxabarni birinchi dadam bilan bo‘lishdim. Ushbu avtomobilni dadamga sovg‘a qilaman. Mening bu qarorimdan oyim ham juda xursand bo‘ladi, albatta.

Vladislav Kudinov, reklama menedjeri (avtomobil sohibi): 

– Yutuqli chek o‘yinlari haqida avvalroq eshitgandim, ammo ishtirok etmagandim. Bu gal tavakkal qilishga va omadimni sinab ko‘rishga qaror qildim. Savdo nuqtalarida, dorixonalarda va yoqilg‘i quyish shoxobchalarida har kuni beriladigan cheklarni ro‘yxatdan o‘tkazish orqali hech narsani yo‘qotmayman deb o‘yladim va 26 ta chekni ro‘yxatdan o‘tkazdim. Menga o‘yin payti jonli efirdan qo‘ng‘iroq qildi va avtomobil g‘olibi bo‘lganim haqida aytib, meni tabrikladi. To‘g‘risini aytsam, o‘shanda hayratdan qotib qolgandim. Mana bugun Chevrolet Nexia 3 avtomobili kalitini topshirdi. Men kreditga mashina olish haqida o‘ylab yurgan edim.... Cheklarni talab qiling, ro‘yxatdan o‘tkazing va men kabi avtomobil yutib oling!

Bugungi taqdirlash marosimining o‘ziga xos tomoni shundaki, yutuqli chek o‘yinlari III tirajining bosh sovrini ham tantanali ravishda topshirildi. Yo‘qotilgan chek topilib, yutuqli o‘yin tashkilotchilariga taqdim etildi. Shunday qilib, ikkala Chevrolet Nexia 3 ning baxtli egasi ham birvarakaiga o‘z mashinalarida uylariga yo‘l oldi.

 DSQ Matbuot xizmati