Ayrim ijtimoiy tarmoqlarda bankrot bo‘lgan xorij korxonasi yirik miqdordagi soliq va boshqa to‘lovlarni to‘lamayotgani (videoda to‘lagan deb xato gapirilgan) haqidagi xabarlar yuzasidan Davlat soliq qo‘mitasi quyidagilarni maʼlum qiladi:
“BF Textile produktion” MCHJ QKda (keyingi o‘rinlarda tashkilot) 2018-yil o‘tkazilgan soliq tekshiruvi natijasida 5,5 mlrd so‘m miqdorida qo‘shimcha soliqlar hisoblanib, uning mansabdor shaxslariga nisbatan jinoyat ishi qo‘zg‘atilgan.
Jamiyatning soliq va yig‘imlardan hozirgi kunda jami 31,2 mlrd so‘m qarzdorligi mavjud bo‘lib, uni majburiy tartibda undirish yuzasidan soliq organlari tomonidan barcha choralar ko‘rilgan. Xususan, bank hisobvaraqlariga inkasso topshiriqnomasi qo‘yilgan, mol-mulki xatlovdan o‘tkazilib, undiruvni mol-mulkiga qaratish bo‘yicha MIBga tegishli tartibda hujatlar yuborilgan.
“Hamkorbank” ATB bilan 2016-2018-yillarda tuzilgan shartnomalar asosida tashkilotga kredit mablag‘i ham ajratilgan bo‘lib, bank oldidagi majburiyatlarini lozim darajada bajarmaganligi sababli, kredit qarzdorligini bank tomonidan sud orqali undirish choralari ko‘rilgan.
Ammo choralar samarali natija bermaganligi bois, “Hamkorbank” ATB tomonidan tashkilotni bankrot deb topish bo‘yicha Toshkent tumanlararo iqtisodiy sudiga daʼvo ariza kiritilgan.
Toshkent tumanlararo iqtisodiy sudining 18.05.2021-yildagi hal qiluv qaroriga asosan “Hamkorbank” ATBning arizasi qanoatlantirilib tashkilot bankrot deb topilgan va hozirda sud boshqaruvchisi tomonidan tugatish ishlari olib borilmoqda.
Qarzdor bankrot deb topilgandan so‘ng davlat ijrochisi ijro ishi yuritishni yakuniga yetkazadi va bankrotlik asosida tugatish ishlarini olib borish uchun ijro hujjatlarini tugatuvchiga yuboradi (“Sud hujjatlari va boshqa organlar hujjatlarini ijro etish to‘g‘risida”gi Qonun, 62-modda).
Qarzdor bankrot deb eʼtirof etilib tugatish boshqaruvchisi tayinlangan kundan eʼtiboran qarzdorning moliyaviy ahvolini tahlil qilish, qarzlarni undirish choralarini ko‘rish majburiyati va boshqa majburiyatlar tugatish boshqaruvchisiga yuklatiladi (“To‘lovga qobiliyatsizlik to‘g‘risida”gi Qonun, 144-modda).
Tashkilotning hozirgi kundagi soliq va boshqa qarzdorliklarini undirish majburiyati tugatish boshqaruvchisi tomonidan taʼminlanishi lozim.