Soliq kodeksining 128-moddasiga muvofiq Yuridik shaxslar o‘zlari joylashgan yerdagi va ularning alohida bo‘linmalari joylashgan yerdagi soliq organlarida hisobga qo‘yiladi.
Agar “Mening holatimni tekshirish” interfeysida soliq xavfining yuqori darajasi hisoblanadigan “Soliq to‘lovchi davlat ro‘yxatidan o‘tkazilgan manzilda mavjud bo‘lmaganligi” mezoni qizil belgi bilan ko‘rsatilgan bo‘lsa, buni ijobiy tomonga o‘zgartirish uchun nima qilish kerak?
Kadastr agentligi ma’lumotlar bazasida korxona ko‘chmas mulki yoki yer maydoni mavjud emasligi, ijara.soliq.uz sayti orqali ijara shartnomasining ro‘yxatdan o‘tkazilmaganligi “Soliq to‘lovchi davlat ro‘yxatidan o‘tkazilgan manzilda mavjud bo‘lmaganligi” mezonida qizil belgi bo‘lishiga sabab bo‘ladi.
- Ko‘chmas mulk holatini davreestr.uz (https://davreestr.uz/) saytida tekshirish orqali muammoni hal qilish mumkin. Mavjud ko'chmas mulk davreestr.uz (https://davreestr.uz/) saytida ko‘rinmasa, u holda kerakli ma'lumotlarni reestrga kiritish uchun Kadastr agentligiga taqdim etish lozim.
- Yuridik shaxsning ko‘chmas mulki mavjud bo‘lganda kadastr agentligi bo‘limlariga ko‘chmas mulki to‘g‘risidagi hujjatlarni taqdim etib, ma’lumotlarni bazaga kiritish lozim.
- Ko’chmas mulk mavjud bo’lmaganda ijara shartnoma tuzgan holda ijara.soliq.uz saytidan ro‘yxatdan o‘tkazish lozim.
Bugungi kunda 75 886 ta korxona ushbu mezon bo‘yicha soliq xavfi yuqori darajaga tushgan.
Vazirlar Mahkamasining 2021-yil 22-sentabrdagi 595-son qaroriga muvofiq soliq to‘lovchi davlat ro‘yxatidan o‘tkazilgan manzilda mavjud bo‘lmasligi soliq xavfining yuqori darajasi hisoblanadi. Bu QQS guvohnomasini vaqtincha to‘xtatilishiga yoki QQS to‘lovchi sifatida maxsus ro‘yxatdan o‘tish uchun taqdim etilgan arizalarni rad etilishiga sabab bo‘ladi.
Eslatib o‘tamiz, Vazirlar Mahkamasining 595-son qarori 2021-yil 22-dekabrdan kuchga kiradi.