Davlat soliq qo‘mitasida yuridik shaxslarning markaziy ma’lumotlar bazasi tashkil etilgan (VM-539-sonli qarori, 4.09.2020-yil).
Soliq organlari tomonidan soliq nazoratini amalga oshirish va soliq to‘lovchilarga xizmatlar ko‘rsatilishida hisob ma’lumotlarining haqqoniyligini ta’minlash maqsadida yuridik shaxslar ma’lumotlari muntazam ravishda tekshirib borilmoqda.
Ushbu jarayonlarda yuridik shaxslarning ta’sischi (ishtirokchisi) to‘g‘risidagi ma’lumotlari (STIR, JShShIR) soliq organining ma’lumotlar bazasida mavjud emasligi holatlari kuzatilmoqda.
Xususan, 2 677 ta korxona ta’sischi (ishtirokchisi) to‘g‘risidagi ma’lumotlar soliq organining ma’lumotlar bazasida mavjud emasligi aniqlanib, 2021-yil avgust oyida ularning shaxsiy kabinetiga ta’sischilari tarkibini to‘liq ko‘rib chiqish va ta’sischi bo‘lgan chet el fuqarosiga JShShIR olish va uni soliq organlariga taqdim etishlari yuzasidan xabarnomalar yuborildi.
*Eslatib o‘tamiz, Vazirlar Mahkamasining 22-sentabrdagi 595-son (https://lex.uz/docs/-5650010) qaroriga muvofiq 2021-yil 22-dekabrdan tadbirkorlik subyektlari ta’sischi (ishtirokchi)si to‘g‘risidagi ma’lumotlar soliq organlari ma’lumotlar bazasida mavjud bo‘lmasligi soliq xavfining yuqori mezonlaridan biri sifatida baholanadi. Bu QQS guvohnomasini vaqtincha to‘xtatilishiga yoki QQS to‘lovchi sifatida maxsus ro‘yxatdan o‘tish uchun taqdim etilgan arizalarni rad etilishiga sabab bo‘ladi.
*Vazirlar Mahkamasining 22-sentabrdagi 595-son qarori rasman eʼlon qilingan kundan boshlab 3 oy o‘tgandan keyin kuchga kirishi belgilangan.