Vositachi shartnomasi asosida realizatsiya qilingan tovar onlayn-NKM va virtual kassa chekida qanday aks ettiriladi? 

Buning uchun komitent tomonidan quyidagilar bajarilishi lozim: 

1.Soliq to‘lovchining my.soliq.uz saytidagi shaxsiy kabinetiga ERI kaliti yordamida kiriladi. 

2. Xizmatlar qatoridan “Korxona komissionerlari ro‘yxatini shakllantirish” tanlanadi.

3. “Qo‘shish” tugmasi bosiladi. 

4. Ochilgan oynaga quyidagi ma’lumotlar kiritiladi:

• yuridik shaxs STIRi yoki YaTT JShShIRi;
• vositachi-tashkilot nomi;
• vositachilik shartnomasi raqami;
• MFO; 
• hisob raqam;
• shartnoma tuzilgan sana;
• sharnoma amal qilish mudati boshlanish sanasi;
• shartnoma amal qilish muddati tugash sanasi.

5. Shundan so‘ng “Qo‘shish” tugmasi bosiladi.

Har bir vositachi haqidagi ma’lumotlarni alohida kiritish lozim. 

Ushbu funksiya soliq organlarida komitent va vositachi soliq bazasini avtomatik aniqlash uchun yaratilgan.

Eslatma. Soliq bazasi quyidagicha aniqlanadi:

- vositachi (ishonchli vakil)ning soliq bazasi ➡️ uning QQSni o‘z ichiga oladigan vositachilik haqi miqdorida;

- komitent (ishonch bildiruvchi)ning soliq bazasi ➡️ komitentning (ishonch bildiruvchining) topshirig‘iga ko‘ra vositachi (ishonchli vakil) tomonidan realizatsiya qilingan tovarlarning qiymati, shuningdek QQSni kiritmagan holda vositachi (ishonchli vakil) tomonidan uchinchi shaxs bilan tuzilgan bitim bo‘yicha komitent (ishonch bildiruvchi) bunday uchinchi shaxsga ko‘rsatgan xizmatlar  qiymati miqdorida.

Soliq kodeksi, 250 modda 

Agar komitent shaxsiy kabinetga vositachilar to‘g‘risidagi ma’lumotlarni yuqoridagi tartibda kiritmasa, vositachi tomonidan realizatsiya qilingan tovarlarning umumiy summasi vositachi soliq bazasida xato tarzda aks etadi.

Tovarlar vositachi shartnomasi asosida realizatsiya qilinganda, vositachi onlayn-NKM va virtual kassa cheklarida ushbu mahsulot nomi ostida komitent STIR/JShShIRini ko‘rsatishi shart. 

Onlayn-NKM ushbu tizim asosda tovar qiymatini avtomatik ravishda komitentning soliq hisobotiga yuboradi. Komitent esa vositachi haqini hisoblab chiqaradi va hisobvaraq-faktura shakllantirish hamda hisobdan hisobga o‘tkazish  yo‘li bilan to‘laydi. 

Vositachi – ushbu funksiyani faollashtirish uchun onlayn-NKM yoki virtual kassa dasturini yangilash yuzasidan texnik xizmat ko‘rsatish markazi (TXKM)ga murojaat qilishi lozim. 

Tovarlar bo‘lib to‘lash (kredit) asosida sotilganda onlayn-NKM va virtual kassa cheklarida qanday aks ettirish mumkin?

Tovarlar jo‘natilgan (berilgan) sana tovarlarni realizatsiya qilish bo‘yicha aylanma amalga oshirilgan sana hisoblanadi.

Soliq kodeksi, 242-modda, 1-qism 

Tovarlar bo‘lib to‘lash (kredit) asosida sotilganda xaridor tovarni darhol oladi. Shu sababli, sotuvchi onlayn-NKM va virtual kassalarning birinchi chekida soliq hisobotida avtomatik ravishda aks etadigan tovarning to‘liq qiymatini ko‘rsatishi lozim. Bunday chekda QR-kod va fiskal belgi shakllantiriladi.

Xaridor tomonidan kreditni so‘ndirish uchun belgilangan jadvalga muvofiq keyingi to‘lovlar amalga oshirilganda, sotuvchi onlayn-NKM va virtual kassada chek turini - "bo‘lib to‘lash" ("Kredit") deb ko‘rsatadi va har bir to‘lov uchun summani belgilaydi. Bunday cheklarda QR-kod va fiskal belgi shakllantirilmaydi.

Tovar realizatsiyasi uchun xarodordan qabul qilingan bo‘nak (avans) onlayn-NKM va virtual kassa cheklarida qanday aks ettiriladi?

Agar tovarni jo‘natish (berish) amalga oshirilmasa, tovarga bo‘lgan mulk huquqi xaridorga o‘tkazilgan kun tovarlarni realizatsiya qilish bo‘yicha aylanma amalga oshirilgan sana hisoblanadi. 

Soliq kodeksi, 242-modda, 2-qism 

Xaridor mahsulotning to‘liq qiymati miqdorida bo‘nak (avans) to‘lovlarini amalga oshirgandan keyingina uni oladi. Shuning uchun, sotuvchi xaridordan tovarga bo‘nak olganda oldindan to‘lov miqdori uchun chek beradi. Bunda, onlayn-NKM va virtual kassada “Bo‘nak” chek turi va tovarning to‘liq qiymatidan xaridor tomonidan to‘langan qismi ko‘rsatilishi lozim. Bunday cheklarda QR-kod va fiskal belgi shakllantirilmaydi.

Xaridor yakuniy to‘lovni amalga oshirganda, onlayn-NKM va virtual kassa chekida tovarning to‘liq qiymati ko‘rsatiladi, belgilangan tartibda QR-kod va fiskal belgi shakllantiriladi. Bunday holda, xaridor tomonidan sotib olingan tovarning to‘liq qiymati soliq hisobotida aks ettiriladi.

Onlayn-NKM va virtual kassada ko‘rsatilgan chek turlari my.soliq.uz saytidagi soliq to‘lovchi shaxsiy kabinetining tegishli bo‘limida ham aks etadi.