Toshkentda vazirlik, idora va tashkilotlar xodimlari o‘rtasida 8 mart – Xalqaro xotin-qizlar kuni arafasida “Sport – nafislik va salomatlik manbai” shiori ostida festival tashkil etildi.
Mazkur tadbir 27-fevral kuni Toshkent moliya institutining sport majmuasida bo‘lib o‘tdi.
Unda Davlat soliq qo‘mitasi, Milliy axborot agentligi, “Oila” ilmiy-amaliy tadqiqot markazi, Milliy gvardiya hamda vazirliklarda faoliyat olib borayotgan xotin-qizlardan iborat 23 ta jamoa ishtirok etdi.
Ishtirokchilar sportning gimnastrada, stol tennisi, suzish, shaxmat, badminton va yengil atletika turlarida jismoniy tayyorgarlik va zukkoliklarini namoyish etdi.
Gimnastrada – musobaqaning eng diqqatga sazovor qismi bo‘ldi. Unda ishtirkochilar musiqiy ohanglar ostida nafis va jozibali raqslarini namoyish etdi. Har bir jamoa dinamika, syujet g‘oyasi, halqa, lenta va boshqa aksessuarlardan mohirona foydalanish borasida o‘ziga xos chiqishlar qildi.
Davlat soliq qo‘mitasi jamoasi vakilalari ham gimnastrada bahslarida gimnastika va akrobatika mahorati jihatidan murakkab bo‘lgan amallarni bajarib, muxlislar olqishiga sazovor bo‘ldi.
“Sport – nafislik va salomatlik manbai” festivali bizda yorqin taassurot qoldirdi, – deydi Davlat soliq qo‘mitasi jamoasi a’zosi Nodira Imamova. – Musobaqalarda jamoamizning har bir a’zosi jasorat, qat’iyat va zakovatini namoyish etdi. Shu bois yengil atletika, badminton va suzish bahslarida sovrindorlar safida bo‘ldik.
Festival ishtirokchilari yoshlikning siri sport bilan muntazam shug‘ullanish va hayotga ijobiy munosabatda bo‘lishda ekanligini isbotladi.
Musobaqa yakuniy natijalariga ko‘ra, Davlat soliq qo‘mitasi jamoasi “Eng irodali jamoa” nominatsiyasi g‘olibi bo‘ldi.
Davlat soliq xizmatining go‘zal xodimalariga tashkilotchilar tomonidan faxriy yorliq va qimmatbaho sovg‘alar topshirildi.
DSQ Matbuot xizmati.