Ижтимоий тармоқларда солиқ органлари "ҳисобот топширмаган ва бошқа камчилиги бор корхоналар”га нисбатан маъмурий чораларни фаол қўллаётгани ҳақида хабарлар тарқалди. Хабарда шунингдек, "жарималарнинг кунлик режаси" ҳақида ҳам эслатиб ўтилган. 

Давлат солиқ қўмитаси мазкур хабар юзасидан қуйидагиларни таъкидлайди: 

"Жарималарнинг кунлик режаси" ҳақидаги хабарлар мутлақо ҳақиқатга тўғри келмайди. 

Маъмурий чоралар қонун ҳужжатларида белгиланган ҳисобот тақдим этиш ва солиқларни тўлаш муддатларини бузган солиқ тўловчиларга нисбатан қўлланилади. 

Солиқ кодексининг 111-моддасига мувофиқ, Давлат солиқ қўмитаси жорий йил май ойи учун ҚҚС ҳисоботини тақдим этмаган 3 375 тадбиркорлик субъектининг ҳисобварақлари бўйича операцияларини тўхтатди.

Эслатиб ўтамиз: 2020 йил 20 июнь (шанба) дам олиш кунига тўғри келди, шу муносабат билан солиқ мажбуриятлари – солиқ ҳисоботини топшириш ва май ойи учун бюджетга ҚҚС тўлаш муддати 2020 йил 22 июнга (душанба) кўчирилган эди. 

Шунга қарамай, фаолият юритаётган уч мингдан зиёд тадбиркорлик субъекти Солиқ кодексининг 273-моддасида белгиланган солиқ ҳисоботини тақдим этиш ва солиқни тўлаш тартибини бузган ҳолда солиқ мажбуриятларини бажармаган.  

Солиқ тўловчиларнинг шахсий кабинетига солиқ ҳисоботларини ўз вақтида тақдим этмаганлиги, шунингдек юқорида келтирилган сабабларни кўрсатган ҳолда уларнинг банкдаги ҳисобварақлари бўйича операциялари тўхтатиб турилиши мумкинлиги тўғрисида билдиришномалар юборилган эди. 

Карантин тартиблари, шунингдек, ҚҚС ва бошқа бир қатор солиқлар бўйича ҳисоботларни тақдим этишнинг муддатлари ўтганлигини инобатга олган ҳолда, ДСҚ солиқ тўловчиларнинг мажбуриятларини эслатиб ўтади. 

Солиқ ҳисоботи солиқ органларига шахс фақат солиқ тўловчи деб эътироф этиладиган солиқлар бўйича Солиқ кодексида белгиланган муддатларда тақдим этилиши керак. 

Ўзбекистон Республикаси Маъмурий жавобгарлик тўғрисидаги кодексининг 175-моддаси биринчи қисмига мувофиқ, солиқларни, бошқа мажбурий тўловларни ҳисоблаб чиқариш ва тўлаш учун зарур бўлган солиқ ҳисоботларини, ҳисоб-китобларни ва бошқа ҳужжатларни тақдим этмаслик, ўз вақтида тақдим этмаслик ёки белгиланмаган шаклда тақдим этиш базавий ҳисоблаш миқдорининг бир бараваридан уч бараваригача миқдорда жарима солишга сабаб бўлади. 

Президентимизнинг ПФ-6029-сонли Фармонида 2020 йилда Ўзбекистон Республикаси Давлат солиқ қўмитаси томонидан белгиланган ҳолларда, солиқ тўловчиларга солиқ ҳисоботларини тақдим этиш муддатларини беш кундан кўп бўлмаган муддатга кечиктирганлик учун жарима солинмаслиги белгиланди. 

Июнь ойи учун ҚҚС ҳисоботини топширишда юқоридагиларни инобатга олишингизни сўраймиз. 

ДСҚ Матбуот хизмати