14 октябр куни Давлат солиқ қўмитаси ютуқли чек ўйинларининг тўртинчи тиражи бўлиб ўтади. Унда қимматбаҳо совғалар ва Chevrolet Nexia 3 автомашинаси ўйналади.

 Иштирок этиш учун онлайн назорат-кассалар ёки виртуал кассалар ёрдамида савдо нуқталарида харид (хизмат) учун берилган чекларни рўйхатдан ўтказинг. Ушбу чекларда ҳажми 30х30 миллиметр бўлган QR кодлар мавжуд бўлади. QR кодни SOLIQ мобил иловасида сканер қилиш ёки чекнинг 12 хонали фискал белгисини 1077 рақамига SMS тарзида юбориш лозим. Чек муваффақиятли рўйхатдан ўтказгандан сўнг, чек эгаси ютуқли ўйин иштирокчисига айланади.

 Жорий йил 9 октябрь ҳолатига 38 мингдан зиёд чек рўйхатдан ўтказилди. Бу биринчи тиражга нисбатан  тўрт баробар кўп демакдир. Шубҳасиз, ютуқли чек ўйинлари истеъмолчилар орасида тобора оммалашиб бормоқда. Мазкур биринчи босқич қамрови фақат Тошкент шаҳридаги савдо ва хизмат кўрсатиш нуқталари билан чегараланган. Кейинчалик барча ҳудудлар миқёсида ўтказиш режалаштирилган. Эслатиб ўтамиз: ғолиб бўлиш эҳтимоли харид миқдорига боғлиқ эмас – чеклар сонининг кўплиги ютиш имкониятини оширади.

 Ютуқли чек ўйинларида барча истовчилар иштирок этиши мумкин. Агар ғолиблар орасида 18 ёшга тўлмаган ва муомалага лаёқатсиз жисмоний шахслар аниқланса, ютуқлар уларнинг қонуний вакиллари томонидан вакиллигини тасдиқловчи ҳужжатларни кўрсатган ҳолда олиниши мумкин.

 Рўйхатдан ўтказиш шартлари:

– битта иштирокчи бир кунда битта савдо шохобчасининг фақат 2 та чекини рўйхатдан ўтказиш ҳуқуқига эга. Бунда рўйхатдан ўтказиладиган чекларнинг умумий сони чекланмаган.

– харид 1000 сўм ва ундан ортиқ суммада амалга оширилган бўлса, чек рўйхатдан ўтказилади.

– яроқсиз ҳолдаги чек – йиртилган, бўялган ёки унинг нусхаси ҳақиқий ҳисобланмайди. Бундай чеклар мукофот бериш учун асос бўлмайди.

 Муҳим: соврин учун тўланадиган жисмоний шахслардан олинадиган даромад солиғи ташкилотчи зиммасига юклатилади.

 Ҳурматли солиқ тўловчилар, агар Сиз маҳсулот (хизмат) харид қилганингизда чек бермаслик ҳолатига дуч келсангиз, солиқ хизмати органларининг ишонч телефони – (71) 244-98-98 га мурожаат қилинг. Солиқ органлари сизнинг ҳуқуқларингизни ҳимоя қилади. Сизларга қулайлик яратиш мақсадида SOLIQ мобил иловасида “Солиқ ҳамкори” тизими ишга туширилган. У орқали солиқ ҳуқуқбузарликлари, шу жумладан, Онлайн НКМ чеки бермаслик ҳолати ҳақида хабар беришингиз мумкин.  

Эслатиб ўтамиз, Солиқ кодексининг 221-моддасида чек беришни рад этганлик учун 5 млн. сўм миқдорида жарима назарда тутилган.

Чекларни талаб қилинг, рўйхатдан ўтказинг, сақлаб қўйинг, ютуқли ўйин иштирокчисига айланинг ва ғолиб бўлинг.

ДСҚ Матбуот хизмати