Bugungi kunda mamlakatimiz soliq tizimida jadal islohotlar jarayoni davom etmoqda. Shu bois Davlat soliq qoʼmitasi oʼzgarishlar mazmun-mohiyatini soliq toʼlovchilarga yetkazish maqsadida targʼibot-tashviqot ishlariga alohida eʼtibor qaratib, ommaviy axborot vositalari orqali axborot tarqatishning turli usullaridan foydalanib kelmoqda.

Hozirda DSQning sohaga oid yangiliklar va boshqa materiallarning birinchi manbai boʼlib xizmat qiladigan rasmiy sayti – https://soliq.uz/, telegram kanali – t.me/soliqnews va ijtimoiy tarmoqlardagi sahifalari mavjud.

Bundan tashqari, ommaviy axborot vositalari bilan faol hamkorlik natijasida joriy yilda davriy nashrlar, televidenie va radiolar orqali soliq organlariga doir 14213 ta xabar eʼlon qilindi. Shu bilan birga, ijtimoiy tarmoqlarda joylashtirilgan xabarlar boʼyicha koʼrishlar soni 22745 tani tashkil etdi, bu koʼrsatkich oʼtgan yilga nisbatan 6 baravarga koʼpaydi.

Yangiliklarni va soliqqa tortishning boshqa jihatlarini keng jamoatchilikka yetkazishda respublikamizning yetakchi moliyaviy-iqtisodiy nashrlaridan biri boʼlgan “Soliq plyus” – “Nalogi plyus” gazetalari muhim ahamiyatga ega boʼlmoqda.

Ushbu nashrlarda soliqqa tortish sohasidagi yangiliklar bilan bir qatorda “Dolzarb”, “Amaliy buxgalteriya”, “Bizning maslahat” ruknlari ostida amaliy yordam berishga qaratilgan materiallar, soliq maslahatchilari, huquqshunos-ekspertlarning sharhlari chop etilmoqda.

Аyniqsa, gazeta oʼquvchilari orasida “Soʼragan edingiz?” rukni ancha ommalashgan. Nashrlarning har bir sonida oʼquvchilarni qiziqtirgan 20 dan 50 tagacha boʼlgan dolzarb savollarga mutaxassislar javobi eʼlon qilinmoqda. Shuningdek, DSQning Sall-markazi (71 202-32-82, qisqa raqam – 1198) orqali kelib tushgan savollarga ham batafsil javoblar joylashtirib borilmoqda.

Bu nashrlarda korxonalar rahbarlari va buxgalterlari, jismoniy shaxs boʼlgan soliq toʼlovchilar tomonidan koʼplab foydali va muhim maʼlumotlar oʼrin olmoqda.

“Soliq plyus” – “Nalogi plyus” gazetalari tahririyati tomonidan soliq sohasidagi qonun hujjatlarining ishlab chiqilishi va qabul qilinishi yuzasidan vakolatli mutaxassislar bilan sharh va intervьyular tashkil etilmoqda hamda muayyan qonun hujjatlarining mazmun-mohiyati batafsil tushuntirilmoqda.

“Soliq plyus” – “Nalogi plyus” – bu 16 ta rangli sahifalardan iborat, soliq toʼlovchilar uchun foydali va zarur boʼlgan maʼlumotlar toʼplamidir. Unda hududlardan xabarlar, voqea joyidan yorqin reportajlar, soliq organlari rahbarlari va mutaxassislari bilan sohadagi soʼnggi yangiliklar boʼyicha intervьyular, shuningdek, tushunarli va foydali tahlillarga asoslangan maqolalar oʼrin olmoqda.

Eslatib oʼtamiz, “Soliq plyus” – “Nalogi plyus” nashrlari uchun faqat ixtiyoriy obuna amal qiladi. Agar siz davlat soliq xizmati organlari xodimlarining vakolatidan chetga chiqish va majburiy obuna qilinishiga duch kelsangiz, u holda DSQning “ishonch telefoni”ga 71-244-98-98 raqami orqali murojaat etishingizni soʼraymiz.

DSQ Matbuot xizmati