Бухоро вилояти солиқ бошқармасида тадбиркорлар билан учрашув ташкил этилди. Унда вилоятдаги 100 нафарга яқин тадбиркорлар, жамоатчилик вакиллари ва оммавий ахборот воситалари ходимлари иштирок этди.

Очиқ мулоқот шаклида ташкил этилган тадбирда вилоят солиқ бошқармаси бошлиғи Д.Юлдашев бугунги кунда солиқ идоралари ўз фаолиятларини янги босқичда амалга ошираётгани, хусусан, солиқ хизмати органлари ходимлари «корхонабай» ва «маҳаллабай» ишлаш тизими орқали солиқ тўловчиларга солиқ мажбуриятларининг ўз вақтида ва тўғри бажарилишида кўмаклашаётгани ҳақида ахборот бериб ўтди.

Тадбирда дастлаб, ўрта, қониқарли ва қуйи барқарорлик рейтингидаги тадбиркорлик субъектларига рейтингдаги кўрсаткичларини яхшилаш бўйича зарур маслаҳатлар бериб ўтилди.

Шунингдек, солиқ идоралари ўртасида ишончни янада мустаҳкамлаш ҳамда коррупция ҳолатларига умуман йўл қўймаслик мақсадида тадбиркорлар томонидан кўтарилган масалалар муҳокама қилинди.

Икки ярим соатдан ортиқ вақт давом этган учрашувда тадбиркорлар «Тадбиркорларнинг барқарорлик рейтинги» электрон платформаси мезонлари бўйича, ЭҲФ, онлайн-НКМлардан фойдаланиш, чекларни таҳрирлаш, тадбиркорлик субъектларини давлат рўйхатидан ўтказиш, ҚҚС гувоҳномасининг амал қилишини тўхтатиб туриш, ер ва мол-мулк солиғи, ортиқча тўланган солиқларни қайтариш, инкассо топшириқномалари, шунингдек, солиқ текширувида қўлланилган молиявий жарималар, солиқ ҳисоботларини тақдим этмаганлик ҳамда тўлов интизомини бузганлик учун маъмурий жавобгарлик масалалари юзасидан ўзларини қизиқтирган саволларни ўртага ташладилар.

Учрашувда сўз олган кўп йиллик тажрибага эга тадбиркорлар бугунги кунда интизомли ва шаффоф бизнес юритиш учун барча зарур шароит ва имкониятлар яратилганини айтиб ўтиб, барқарорлик рейтингида кўзда тутилган рағбатлантириш чоралари қонун доирасида фаолият юритишга хизмат қилишини таъкидлаб ўтдилар.

Мулоқотда бошқарма бошлиғи ва соха мутахассислари ҳамкорлигида тадбиркорлар томонидан кўтарилган кўплаб масалалар шу ернинг ўзида ўрганиб чиқилиб, уларнинг ечимлари бўйича зарур масалаҳатлар берилди. Эътиборлиси, учрашувда бир қатор тадбиркорлик субъектларининг масалалари жойида ижобий ҳал этилгани солиқ органларининг тадбиркорлик субъектларининг ҳақиқий кўмакчисига айланганини яна бир бор исботлади.

Бухоро вилоят солиқ бошқармаси Матбуот хизмати