Ютуқли чек ўйинлари бошланиши билан харидорларнинг онлайн назорат-касса машиналари ёки виртуал кассалардан бериладиган чекларга қизиқиши тобора ортиб бормоқда. Бунинг ўзига хос сабаблари бор. Келинг бунга биргаликда аниқлик киритамиз.

Онлайн назорат-касса машинаcи ва виртуал касса – фискал модулга боғланиш имкониятига эга бўлган, фискал маълумотларни фискал маълумотлар операторига реал вақт режимида узатишни таъминловчи ва қоғозга чоп этувчи ёки қонунчиликка мувофиқ электрон шаклини юбориш имкониятига эга махсус қурилма ёки дастурий маҳсулот. У ҳар бир чек ҳақидаги батафсил маълумотларни солиқ органларига автоматик тарзда узатиб туради. Амалдаги қонунчиликка кўра, барча дорихоналар, АЁҚШлар, тамаки ва алкоголь маҳсулотлари савдоси билан шуғулланувчи шохобчалар, шунингдек, ўтган йил якунлари бўйича йиллик айланмаси 5 млрд. сўмдан ошган тадбиркорлик субъектлари Онлайн назорат-касса машиналари ёки виртуал кассалардан фойдаланиши шарт (ПФ-5813-сон). Шунга кўра, юқорида кўрсатилган нақд пул тушумига эга бўлган барча тадбиркорлик субъектлари истеъмолчиларга онлайн назорат-касса машиналари ёки виртуал касса чекларини бериши мажбурийдир.

Давлат солиқ қўмитаси “SOLIQ” мобил иловасининг “Чекни рўйхатдан ўтказиш” бўлимида онлайн назорат-касса машинаси ва виртуал касса ўрнатилган савдо ёки хизмат кўрсатиш шохобчаларининг харитадаги координаталари кўрсатилган. Бундан ташқари, онлайн назорат-касса машинаси ёки виртуал касса ўрнатилган савдо ва хизмат кўрсатиш шохобчаларида буни билдирувчи махсус стикерлар мавжуд.

Шу маълумотлар асосида шохобча онлайн назорат-касса машинаси ёки виртуал касса фойдаланувчиси эканлигини билишингиз мумкин.

Чекнинг имкониятлари

QR кодли ёки фискал белгили чек – бу чекларнинг янги авлоди. У фойдаланувчи (сотувчи) ва харидор (мижоз) ўртасида ҳисоб-китоб (сотилган товарлар, ишлар, хизматлар) ҳақида тўлиқроқ маълумотларни ўз ичига олади.

Бу Вазирлар Маҳкамасининг 23.11.2019 йилдаги “Онлайн назорат-касса машиналари ва виртуал касса тизими қўлланилишини таъминлаш чора-тадбирлари тўғрисида”ги 943-сонли қарорида белгиланган.

Янги авлод чеклари мониторинги учун ofd.uz манбаси жуда қулай. Истеъмолчилар фискал маълумотлар оператори (ofd.uz) сайтида рўйхатдан ўтиши ва рўйхатдан ўтказилган (онлайн- назорат-касса машинаси ёки виртуал касса) чеклари тўғрисидаги батафсил маълумотларни билиб олиши мумкин.

(Эслатма: Онлайн назорат-касса машиналари ва виртуа касса чеклари “SOLIQ” мобил иловаси орқали чекнинг QR-кодини сканер қилиш ёки фискал белгисини 1077 қисқа рақамига юбориш орқали рўйхатдан ўтказилади.)

Ютуқли чек ўйини иштирокчилари ofd.uz сайтидаги шахсий кабинетида (https://ofd.uz/ru/site/profil) рўйхатдан ўтган чекларни текшириш имконига эга. Бу борада бирон бир савол туғилса, https://t.me/ofdfmo телеграм гуруҳига ёки (71) 202-32-32 телефон рақамига мурожаат қилиш мумкин.

Ofd.uzда, Давлат реестрига киритилган барча онлайн назорат-касса машиналари ва виртуал кассалар ҳамда уларга хизмат кўрсатувчи техник хизмат кўрсатиш марказлари тўғрисидаги маълумотлар жамланган. Жумладан онлайн назорат-касса машинаси ва виртуал кассадан фойдаланиш қўлланмалари, уларнинг ишлаб чиқарувчилари ва техник хизмат кўрсатиш марказлари call-марказлари рақамлари ва бошқа керакли маълумотлар акс эттирилган.

Оператор фискал маълумотларни онлайн режимда мустақил ва узлуксиз қабул қилиш, қайта ишлаш, криптографик ҳимоялаш ҳамда сақлаш вазифаларини бажаради.

Бундан ташқари, тадбиркорлик субъектларини ҳимояланган дастурий таъминот ўрнатилган фискал модуль билан таъминлайди. Солиқ тўловчининг шахсий кабинетида онлайн назорат-касса машинаси ёки виртуал касса орқали амалга оширилган реализацияларнинг батафсил маълумотларини шакллантиради ва фискал маълумотларни 5 йил мобайнида сақлайди.

Ушбу масъулият Давлат солиқ қўмитаси ҳузуридаги “Янги технологиялар” илмий-ахборот маркази ДУКга юклатилган.

Шахсий кабинет афзаллиги

Ютуқли чек ўйинларига старт берилиши билан 13 минг нафардан ортиқ фуқаро шахсий кабинетдан фойдаланишни бошлади. Рўйхтадан ўтказилган чекларнинг батафсил маълумотлари ofd.uz да шахсий кабинетда шакллантирилмоқда. Шахсий кабинетнинг қулайлиги фуқароларни жалб этди – ҳар бир чек бўйича батафсил маълумотлар (фискал белги, фискал модул ва чек рақами), рўйхатдан ўтиш санаси ва харид тафсилотлари кабинетда акс эттирилади.

Истеъмолчи шахсий кабинетида олган чеклари бўйича статистик маълумотларни – тўлов қайси шаклда ва қачон амалга оширилганлиги, чек ютуқли ўйинларнинг навбатдаги тиражида иштирок этиш учун ҳақиқатан ҳам рўйхатдан ўтганлигини билиб олиши мумкин.

Жорий йил 27 октябрь ҳолатига 61 305 та савдо ва хизмат кўрсатиш шохобларига 62 420 та онлайн назорат-касса машиналари ва виртуал кассалар ўрнатилган. Ушбу смарт кассалар чоп этган 52 миллион 891 204 та чек орқали келиб тушган жами тушум миқдори 14,5 миллиард сўмдан ортиқни ташкил этади.

Маълумот учун, 28 октябрь ҳолатига ютуқли чек ўйинлари V тиражида иштирок этиш учун 27 мингдан зиёд чек рўйхатдан ўтказилди.

ДСҚ Матбуот хизмати