Davlat soliq qo‘mitasida «Huquqiy savodxonlik oyligi»ni yuqori saviyada o‘tkazish, xodimlarda yuksak kasbiy axloq-odobni, korrupsiyaga qarshi turish madaniyatini va unga toqatsiz munosabatni shakllantirish maqsadida O‘zbekiston Respublikasi Prezidenti huzuridagi Davlat xizmatini rivojlantirish agentligining Psixologik baholash va ijtimoiy tadqiqotlar metodologiyasi boshqarmasi boshlig‘i J.Maxmudov hamda mazkur boshqarma masʼul xodimi B.Abdullayevlar ishtirokida joriy yilning 22-iyul kuni «Case solving» – masalalarni yechishga qaratilgan kvest-trening (psixologik trening) o‘tkazildi. 

Tadbir davomida Agentlikning malakali xodimlari tomonidan kasbiy odob-axloqni doimiy rivojlantirish, korrupsiyaviy holatlarni vujudga keltiruvchi omillarni bartaraf etish, shuningdek, mehnat faoliyatida stressni boshqarish va boshqa ahamiyatli mavzularda tegishli tushuntirishlar berildi. 

Kvest-trening interaktiv tarzda o‘tkazilib, xodimlar tomonidan “Korrupsiya nima?”, “Korrupsiyaning kelib chiqish sabablari?” va “Korrupsiyani oldini olish mexanizmi” kabi mavzularda taqdimotlar tayyorlandi.

Har bir jamoa taqdimotlarni o‘tkazishda originallik, amaliylik, noodatiylik va erkinlik tamoyillaridan foydalandi. 

Tadbir yakunida “Vijdon”, “Antikorrupsiya” hamda “Namunali soliqchi” jamoalar sardorlari fahriy yorliq va esdalik sovg‘alar bilan taqdirlandi.

Bunday tarzdagi psixologik treninglar davlat xizmatchilari huquqiy ongi va madaniyatini yuksaltirish, ularda korrupsiya va boshqa huquqbuzarliklarga nisbatan murosasizlik munosabatini shakllantirishda samarali amaliy yordam beradi. 

Bo‘lib o‘tgan trening nafaqat bilim olish va ko‘nikmalarni oshirish, balki jamoa bo‘lib ishlash, o‘zaro fikr, tajriba va g‘oya almashish maydoniga aylandi.