Ўзбекистон Республикаси Вазирлар Маҳкамаси ҳузуридаги Солиқ қўмитаси

Деҳқонободда тадбиркорлик янада ривожланади

09/04/2021

Деҳқонобод туманида писта ва каврак плантациялари ташкил этилади. Бу Вазирлар Маҳкамасининг 2021 йил 5 апрель куни қабул қилинган «Қашқадарё вилоятининг Деҳқонобод туманини ижтимоий-иқтисодий ривожлантириш бўйича қўшимча чора-тадбирлар тўғрисида»ги 182-сон қарорида белгиланди.

Деҳқонобод туманини ижтимоий-иқтисодий ривожлантириш, шу жумладан, писта ва каврак етиштириш бўйича мавжуд имкониятлардан самарали фойдаланиш, тадбиркорликни ривожлантириш учун шарт-шароитлар яратиш, шунингдек, аҳоли бандлигини таъминлаш мақсадида қабул қилинган мазкур ҳужжатда:

– туманда писта ва каврак плантацияларини (кейинги ўринларда — плантация) ташкил этиш;

– туманда масъулияти чекланган жамият шаклида «Тадбиркорликни ривожлантириш офиси» (Лойиҳа офиси)ни ташкил этиш ва унинг вазифалари белгиланмоқда.

Қарорга кўра, Давлат солиқ қўмитаси:

– Лойиҳа офисининг фаолияти ташкил этилишини таъминлайди. Келгусида салоҳиятли инвесторни аниқлаб, у билан белгиланган тартибда сотиш шарти билан давлат-хусусий шериклик битимини тузади;

– Лойиҳа офисининг устав фондини шакллантириш учун ўз тизимидаги ташкилотларнинг 2020 йилги соф фойдаси ҳисобидан 4 млрд. сўм миқдорида маблағ ажратади.

Шунингдек қарор билан писта ва каврак плантацияларини ташкил этиш учун ажратилган 24 та лот рўйхати ҳам тасдиқланди.

Бунда лойиҳалар сони, қиймати, манзили ва кўрсаткичлар ўзгариши мумкин.

Лойиҳа офисига жами лотларга ажратилган ерлардан писта ва каврак кўчатларини, шунингдек плантацияларини етиштириш учун 100 гектаргача бўлган тажриба майдони (даласи) туман ҳокими қарори асосида ажратилади ва унга мазкур қарорда писта ва каврак плантацияларини яратиш учун назарда тутилган талаблар (танловда иштирок этиш бундан мустасно) татбиқ этилади.

ДСҚ Матбуот хизмати