Айни пайтда Фарғона вилояти 4-сектор ҳудудида 836 минг 920 нафар аҳоли истиқомат қилади.

Таъкидлаш жоиз, пандемия даврида “Саҳоват ва кўмак” умумхалқ ҳаракати доирасида 4-сектор ҳудудидаги ёрдамга муҳтож 10 минг 150 та эҳтиёжманд оилалардаги 39 466 нафар аҳоли рўйхати шакллантирилиб, уларни камбағалликдан чиқариш чораларини кўриш борасида  давлат солиқ идоралари томонидан тизимли ишлар олиб борилмоқда.

Ҳозирга қадар 4-сектор ҳудудидаги 9 минг 380 та эҳтиёжманд оилаларга 2 млрд. 311 млн.сўмлик озиқ-овқат маҳсулотлари, дори-дармон воситалари етказиб берилди ҳамда моддий ёрдамлар кўрсатилди.

Шунингдек, 101 та хонадонга давлат солиқ идоралари кўмаги билан иссиқхоналар қуриб берилиб, 52 та хонадонга экин ерлари ажратилди, 48 та хонадонга эса чорва моллари олиб берилди.

Қўштепа тумани Қоражийда МФЙда истиқомат қилувчи Ҳалилова Ўғилойнинг оиласи эҳтиёжмандлар рўйхатида туради. Турмуш ўртоғи бевақт вафот этиб, 4 нафар фарзандни ёлғиз ўзи тарбиялаётган онанинг ниятлари бисёр, болалари камолини кўришни истайди.

Шу боис, Фарғона вилояти давлат солиқ бошқармаси бошлиғи Шукурулло Нисбатхонов томонидан 4-сектор ҳудудида жойлашган мазкур  оила ҳолидан хабар олинди, зарур озиқ-овқат маҳсулотлари етказилиб, ўзини ўзи банд қилиш орқали оиланинг доимий даромадга эга бўлиши ва йил якунига қадар уларни эҳтиёжмандлар рўйхатидан чиқариш мақсадида Ў.Ҳалиловага тикув дастгоҳи совға қилинди.

Эндигина 18 ёш бўлишига қарамай тикиш-бичиш сир-асрорларини етарлича эгаллаб, шогирдларга ҳам ўргатишни бошлаб юборган Муқимова Ҳаётхон 4-сектор томонидан берилган замонавий тикув дастгоҳини кўриб боши кўкка етди.

– Чеварчиликни ўрганганимга анча вақт бўлган бўлсада, буюртмага олган кўйлакларимни айтилган вақтда тикиб беришга қийналардим. Сабаби уйимиздаги эски тикув дастгоҳидан фойдаланиб келардим, – дейди Муқимова Ҳаётхон.  Бугун бизнинг оилага замонавий дастгоҳ берилганидан жуда ҳам хурсандман. Эндиликда ишим ҳам сифатлироқ бўлади, ҳам икки баробар кўпроқ буюртмаларни қабул қилиш имкониятига эга бўлдим. Энг асосийси эса буюртмаларни ўз эгаларига айтилган вақтда тикиб бера оламан. Бу орқали оилам даромади ортишига кўмаклашаман.

Шу куннинг ўзида яна бир қўштепалик фуқаро Абдуллаев Эркинжон хонадонига ҳам ташриф буюрилди. Дўрмон МФЙ Улуғвор кўчасида яшовчи ушбу оилада ота-она 2 нафар ёш болалари билан истиқомат қилади. Оила тумандаги эҳтиёжманд оилалар рўйхатида бўлиб, яқинда сектор томонидан ичимлик суви тармоғи тортиб берилган эди. Энди эса турли пишириқлар тайёрлаб сотиш орқали доимий даромад олишни мақсад қилган оилага мини печ олиб берилди, зарур озиқ-овқат маҳсулотлари етказилди.

Бундан ташқари, чекка қишлоқда жойлашган оиланинг шароитлари ва ерларини кўриб, хонадон соҳиби билан суҳбатлашган 4-сектор раҳбари бу ерда иссиқхона қуриш имкони борлигини таъкидлаб, ушбу савобли ишни амалга ошириш учун тегишли ташкилотлар томонидан субсидия ажратиб, 1 ҳафта муддатда иссиқхона қуриш таклифини берди. 

Шунингдек, Фарғона шаҳридаги “Forest Color” масъулияти чекланган жамиятига ҳам давлат солиқ идоралари томонидан “Солиқчи – тадбиркорга кўмакчи” тамойили асосида амалий ёрдамлар кўрсатилмоқда. 100 га яқин турдаги кийим-кечаклар ишлаб чиқараётган корхона айни пайтда ўз маҳсулотларини ички бозорга реализация қилмоқда. Корхона иш бошқарувчиси Эҳсонов Сардорнинг таъкидлашича, йил якунига қадар тайёр маҳсулотлар Россия ва Украина каби давлатларга экспорт қилинади.

Иш ҳажми кун сайин кенгаяётган “Forest Color” корхонасида янги ишчиларга бўлган талаб ҳам ортмоқда. Шу боис, яратилаётган янги иш ўринларига, биринчи навбатда,  4-секторга иш сўраб мурожаат қилган ёшлар жалб этилмоқда. Сўнгги уч кун ичида 10 нафар ана шундай ёшлар ушбу корхонага ишга жойлаштирилди.

 Албатта, аҳолининг камбағал қатламларини қўллаб-қувватлашда амалга оширилаётган бу каби ишлар келажакда ўз самарасини бермай қолмайди. Айниқса, кичик тадбиркорлик субъектлари ривожланади, янги иш ўринлари яратилади, натижада, коронавирус пандемияси туфайли ўрнатилган чекловлар шароитида аҳоли даромадлари кескин камайиб кетиши олди олинади.

Якунда эса яратилган иш ўринлари ва тадбиркорлик субъектлари ҳисобига давлат бюджетига солиқ тушумлари ортади ҳамда мамлакат иқтисодий барқарорлиги таъминланади.

Фарғона вилояти ДСБ
Матбуот хизмати