Янги таҳрирдаги Солиқ кодексида давлат солиқ хизмати органига жорий ҳисобот даври учун тахмин қилинаётган юридик шахслардан олинадиган фойда солиғининг суммаси ҳақида маълумотнома тақдим этиш бўйича норма киритилмади.

Фойда солиғи бўйича берилган имтиёзлар, шу билан бирга, Миллий гвардия органларидаги қўриқлаш хизматлари учун, шаҳар йўловчилар транспортида (таксидан, шу жумладан йўналишли таксидан ташқари) йўловчиларни ташиш бўйича хизматлар кўрсатишдан олинган ва бошқа имтиёзлар бекор қилинди.

Давлат облигациялари ва давлатнинг бошқа қимматли қоғозлари бўйича даромадлар, шунингдек Ўзбекистон Республикаси резидентлари бўлган юридик шахсларнинг халқаро облигациялари бўйича даромадлари солиққа тортишдан озод этишни назарда тутадиган имтиёз сақлаб қолинди (СК 316-модда).

Ушбу чоралар солиқ тўловчиларнинг солиқ қонунчилигини ижро қилиш билан боғлиқ харажатларини камайтириш имконини беради ва Жаҳон банкининг ҳар йиллик “Бизнесни юритиш” ҳисоботида Ўзбекистон Республикаси рейтингини яхшилашга кўмаклашади.

Солиқ кодексининг 339-моддасига мувофиқ, Фойда солиғини ҳисоблаб чиқариш ва солиқ ҳисоботини тақдим этиш тартиби:

-    ҳисобот (солиқ) даврининг якунлари бўйича солиқ суммаси солиқ тўловчи томонидан мустақил равишда аниқланади.

-   ҳисобот даври якунлари бўйича солиқ суммаси солиқ даврининг бошидан ошиб борувчи якун билан, солиқ базасининг солиқ ставкасига мувофиқ бўлган фоизлардаги улуши сифатида ҳисоблаб чиқарилади.

-  солиқ тўловчи белгиланган ҳолларда ва тартибда фойда солиғини ёки чет давлатда тўланган даромадлардан олинадиган худди шундай турдаги тўланган солиқни ҳисобга ўтказиш йўли билан солиқ суммасини камайтиришга ҳақли.

-         солиқ ҳисоботи барча солиқ тўловчилар томонидан ҳар бир ҳисобот ва солиқ даври ўтганидан кейин солиқ бўйича ҳисобда турган жойидаги солиқ органига тақдим этилади.

Солиқ ҳисоботи қуйидаги муддатларда тақдим этилади:

-    ҳисобот даври якунлари бўйича – ҳисобот давридан кейинги ойнинг 20 кунидан кечиктирмай;

-    солиқ даври якунлари бўйича – солиқ даври ўтгандан кейинги йилнинг 1 мартидан кечиктирмай.

  Бюджет ташкилотлари ва нодавлат нотижорат ташкилотлари томонидан солиқ бўйича солиқ ҳисоботи солиқ даври якунларига кўра тақдим этилади, бундан матлубот кооперативлари мустасно.

  Бунда ўтган солиқ даври якунлари бўйича жами даромад мавжуд бўлмаган тақдирда солиқ ҳисоботини тақдим этиш талаб қилинмайди.