Солиқ қўмитасининг навбатдаги кенгайтирилган Ҳайъат йиғилиши ўтказилди.

Унда 2023 йил якунлари ва 2024 йилнинг дастлабки ойи натижадорлиги танқидий равишда кескин муҳокама этилиб, устувор вазифалар белгилаб олинди.

Жумладан:

▫️маҳаллабай ишлаш янги институтининг имкониятларидан тўлиқ фойдаланиш ҳисобига маҳаллий солиқлар базасини кенгайтириш;

▫️истеъмол бозори ва иқтисодиётнинг ўсишига мос равишда тушумларни таъминлаш;

▫️яширин иш ўринлари ва иш ҳақини легаллаштириш, солиқдан қочиш схемаларининг олдини олиш;

▫️ходимларнинг иш самардорлиги (КПИ) ва малакасини ошириш, кадрларни танлаш ҳамда тизимда ижро интизомини янада мустаҳкамлаш масалалари жиддий танқид қилинди.

Шунингдек, қўмита раиси ўринбосарлари, ҳудудий бошқарма ва туман (шаҳар) раҳбарларининг ҳисоботлари эшитилди.

Зиммасига юклатилган хизмат вазифаларини етарли даражада бажармаган, иш фаолиятида хато ва камчиликларга йўл қўйган ходимларга интизомий чоралар қўлланилди. Хусусан, Избоскан тумани солиқ инспекцияси бошлиғи M.Mirzayev, Асака тумани солиқ инспекцияси бошлиғи A.Qodirov, Шароф Рашидов тумани солиқ инспекцияси бошлиғи E.Erkabayev, Дўстлик тумани солиқ инспекцияси бошлиғи M.Tursunmuratov, Оқдарё тумани солиқ инспекцияси бошлиғи O.Ilyasov, Жомбой тумани солиқ инспекцияси бошлиғи B.Baratovlarga ҳайфсан берилди.

Жорий йилда солиқ органларининг устувор вазифалари 2024 йил 16 январь куни Ўзбекистон Республикаси Президенти раҳбарлигида макроиқтисодий комплекс бўйича ўтказилган видеоселектор йиғилишида белгилаб берилганлиги ва уларнинг сўзсиз ижросини таъминлашга қаратилган йўл харитаси лойиҳаси муҳокама этилди.

Бунда:

▪️солиқ базасини камида 20-30 %га ошириш орқали белгиланган прогноз кўрсаткичлари ва қўшимча даромадларни жалб этиш ҳисобига солиқ тушумлари барқарорлигини таъминлаш;

▪️маҳаллабай ишлаш тизимини кенгайтириш ва давлат улуши юқори солиқ тўловчилар билан «корхонабай» ишлаш ҳамда тўлов интизомини мустаҳкамлаш;

▪️тадбиркорларга хизмат кўрсатиш, уларнинг ишончини қозониш ва маъмурчиликни янада яхшилашга қаратилган соҳани рақамлаштиришни изчил давом эттириш;

▪️солиқ мажбуриятини ихтиёрий бажаришни рағбатлантириш ва фақат рейтинг кўрсаткичлари асосида манзилли текширишлар ҳисобига ҳар бир ходим, ҳар бир текшириш самарадорлигини ошириш;

▪️ходимларнинг дунёқараши, малакаси, Ватанга ва хизмат бурчига садоқати ҳамда шахсий масъулиятини ошириш каби қўшимча вазифалар белгилаб олинди. 

Йиғма-ахборот таҳлил бошқармаси