Жорий йилнинг 12-13-октябрь кунлари Фарғона, Наманган ва Андижон вилоятларида Солиқ қўмитаси Раиси маслаҳатчиси ва Шахсий хавфсизлик бошқармаси масъуллари солиқ хизмати ходимлари билан учрашувлар ўтказди. 

Учрашувларда коррупцияга қарши курашиш ҳамда унинг олдини олиш, иш жараёнида қатъий меҳнат интизомига риоя қилиш масалалари ва одоб-ахлоқ қоидалари ҳақида сўз борди. Солиқ органларини коррупциясиз тизимга айлантириш борасида амалга оширилаётган ишлар ҳақида ҳам маълумотлар берилди. 

Хусусан, ходимларга вазифаларини сидқидилдан бажариши, мансаб ва ваколатини суиистеъмол қилмаслик, солиқ тизимида яратилган имкониятлар аҳамияти тушунтирилди. 

Бундан ташқари давлат хизматчилари ўртасидаги ўзаро ахлоқий муносабатлар, ишчанлик обрўси ва солиқ хизмати органлари нуфузига путур етказиши мумкин бўлган ҳаракатлар, коррупцияга йўл қўймаслик, хизмат фаолияти ва хизматдан ташқаридаги одоб-ахлоқ қоидалари ҳақида тушунтиришлар берилди. 

Солиқ тўловчилар билан ўрнатиладиган мулоқот маданиятининг ўзига ҳос усуллари ҳақидаги билимлар, айниқса, ёш ходимларнинг тажрибаларини бойитди.

Қатъий меҳнат интизомига амал қилиш фаолият самарадорлигини оширишга оид маълумотлар ҳам солиқ ходимлари диққат марказида бўлди. 

Давлатимиз раҳбари томонидан солиқ органларига юклатилган вазифаларни шараф билан адо этиш биргина солиқ тушумларини ўз вақтида бажаришгагина эмас, балки жамоада ижро-интизоми ўрнатилишига ҳам боғлиқ. Шу боисдан ҳам мансаб вазифасини суиистеъмол қилмаслик, ҳалол меҳнат ҳар бир солиқчининг олтин қоидасига айланиши керак.

Тадбирлар давомида келтирилган коррупция инсон ва унинг оиласи тақдирини пароканда қилишига оид ҳаётий мисоллар мулоқот таъсирчанлигини янада оширди.

Мазкур тарғибот тадбирларида ҳудудий солиқ инспекциялари ходимлари ҳам ZOOM платформаси орқали иштирок этди.