O'zbekiston Respublikasi Soliq qo'mitasi

Кун тартибида – муҳим саналар мазмун-моҳияти

19/11/2019

Давлат солиқ қўмитасида 18 ноябрь – Давлат байроғи қабул қилинган кун ва жорий йилнинг 22 декабрь куни Олий Мажлис Қонунчилик палатаси ва маҳаллий кенгашлар депутатлигига ўтказиладиган сайловларга бағишланган тадбир ўтказилди.

Унда Давлат юридик университетининг фуқаролик ҳуқуқи кафедраси профессори, юридик фанлар доктори Миродил Баратов ўз маърузаси билан иштирок этди.

1991 йил 18 ноябрь куни “Ўзбекистон Республикаси Давлат байроғи тўғрисида”ги Қонун қабул қилинди. Ушбу қонунда давлат байроғи мамлакатнинг давлат суверенитети рамзи эканлиги белгилаб қўйилган.

Тадбирда қайд этилганидек, Давлат байроғи юртдошларимиз қалбида ватанпарварлик туйғусини кучайтириш, халқаро майдондаги нуфузини оширишда муҳим восита бўлиб хизмат қилади.

Тарихий қадриятлар асосида яратилган, ўтмиш, ҳозирги ва келажакни акс эттирувчи Давлат байроғини ҳурмат қилиш ҳар бир фуқаронинг муқаддас бурчидир.

Шунингдек, “Ўзбекистон Республикаси Олий Мажлиси Қонунчилик палатаси, халқ депутатлари вилоят, туман ва шаҳар Кенгашларига депутатлар сайловига тайёргарлик кўриш бўйича асосий чора-тадбирлар дастури”га мувофиқ, 22 декабрь куни бўлиб ўтадиган сайловларга қизғин тайёргарлик ишлари хусусида сўз юритилди. Бунда 2017-2021 йилларга мўлжалланган Ўзбекистон Республикасини ривожлантириш бўйича ҳаракатлар стратегиясида белгиланган вазифалар муҳим омил бўлмоқда.

Тадбир давомида давлат солиқ хизмати органлари ходимлари ўзларини қизиқтирган барча саволларга батафсил жавоб олдилар.

ДСҚ Матбуот хизмати