Maʼmuriy huquqbuzarlik toʻgʻrisidagi ish yuzasidan qaror ustidan yuqori turuvchi organga yoki jinoyat ishlari boʻyicha tuman (shahar) sudiga shikoyat berilishi mumkin. 

Shikoyat maʼmuriy huquqbuzarlik toʻgʻrisidagi ish yuzasidan qaror qabul qilgan organ (mansabdor shaxs) orqali yoki bevosita shikoyat yoʻllangan sudga yuboriladi. 

MJtK 315-modda 

Maʼmuriy huquqbuzarlik toʻgʻrisidagi ish yuzasidan chiqarilgan qaror xususida shu qarorning nusxasi olingan kundan eʼtiboran 10 kun ichida shikoyat berilishi mumkin. 

Mazkur muddat uzrli sabablar bilan oʻtkazilib yuborilgan taqdirda, ushbu muddat shikoyatni koʻrib chiqishga vakolatli organ (mansabdor shaxs) tomonidan qayta tiklanishi mumkin. 

MJtK 316-modda

Shikoyat belgilangan muddatda berilganda, maʼmuriy jazo qoʻllash toʻgʻrisidagi qaror ijrosi shikoyat koʻrib chiqilgunga qadar toʻxtatib turiladi. 

MJtK 318-modda

Shikoyat tushgan kundan boshlab 10 kun muddatda koʻrib chiqiladi. 

MJtK 319-modda

Maʼmuriy huquqbuzarlik toʻgʻrisidagi ish yuzasidan chiqarilgan qaror xususida berilgan shikoyatni koʻrib chiqish paytida yuqori turuvchi soliq organi (mansabdor shaxs) quyidagi qarorlardan birini qabul qiladi:

• chiqarilgan qarorni oʻzgarishsiz, shikoyat yoki protestni esa qanoatlantirishsiz qoldiradi;
• chiqarilgan qarorni bekor qiladi va ishni qayta koʻrib chiqish uchun yuboradi;
• chiqarilgan qarorni bekor qiladi va ishni yuritishni toʻxtatadi; 
• jazo chorasini kuchaytirmagan holda uni maʼmuriy huquqbuzarlik uchun javobgarlik toʻgʻrisidagi normativ hujjatda nazarda tutilgan doirada oʻzgartiradi. 

MJtK 321-modda 

Maʼmuriy huquqbuzarlik toʻgʻrisidagi ishni koʻrishni tugatish bilan qarorni bekor qilish quyidagilarga sabab boʻladi: 

- undirib olingan pul summalarini qaytarib berishga; 

- ilgari qabul qilingan qaror bilan bogʻliq boshqa cheklashlarni bekor qilishga. 

MJtK 324-modda