2019 йил 5 декабрь куни Давлат солиқ қўмитаси раҳбарияти Тошкент шаҳрида фуқаролар билан сайёр қабул ўтказди.

ДСҚ раҳбарияти, масъул ходимлари ва тўртинчи сектор вакилларининг сайёр қабулдаги дастлабки манзили Шайхонтоҳур туманидаги “Чарх-Новза” маҳалла фуқаролар йиғини бўлди.

Очиқ мулоқот тарзида ўтган учрашувда фуқаролар ўзларининг муаммоли масалаларини ДСҚ раиси ва Шайхонтоҳур тумани ҳокими билан юзма-юз равишда муҳокама этиш имконига эга бўлишди.

Фуқароларнинг аксарияти фарзандлари учун ногиронлик ва саратон касаллиги бўйича тиббий кўрикдан ўтишда ёрдам сўраб мурожаат қилишди.

Шу билан бирга, аҳоли вакиллари касалхоналарда даволаниш учун рухсатнома ва кекса ёшдагилар учун санаторияларга йўлланма олишда ёрдам сўрашди. Юқоридаги барча масалалар жойида ҳал қилинди.

Айрим фуқаролар тўртинчи сектор вакилларига ўзларининг самимий миннатдорчилигини билдирдилар:

– Масъул раҳбарларга кўрсатилаётган бундай беминнат ёрдам ва ғамхўрлик учун катта раҳмат айтмоқчиман, – дейди “Янгиобод” маҳалла фуқаролар йиғини раиси Манзура Валиева. – Жорий йилда маҳалламиздаги 15 та кўча таъмирланди, кам таъминланган оилаларга уй-жой ва ногиронлик нафақасини олишда амалий ёрдам кўрсатилди.

“Чарх-Новза” маҳалла фуқаролар йиғини аҳолиси учун озиқ-овқат ярмаркаси ташкил этилди. Аҳоли учун бирламчи маҳсулотларни арзон нархларда харид қилиш имконияти яратилди.

Имконияти чекланган фуқароларнинг илтимосига биноан ногиронлик аравачалари ва эшитиш мосламалари топширилди.

Сайёр қабул давомида кам таъминланган оилаларга 10 турдаги озиқ-овқат маҳсулотлари, телевизорлар ва микротўлқинли печлар моддий ёрдам сифатида тақдим этилди.

Айниқса, уч нафар оилага молиявий ёрдам берилгани улар учун унутилмас воқеа бўлди.

“Чарх-Новза” маҳалла фуқаролар йиғинида 215 дан ортиқ фуқаролар қабул қилинди ва мурожаатларнинг 85 фоизи ўша жойнинг ўзида ҳал этилди. Қолган 15 фоиз мурожаатлар эса, ДСҚ раҳбарияти томонидан қатъий назоратга олинди.

Сайёр қабулнинг навбатдаги манзили 674-сайлов участкаси бўлиб, унда Олий Мажлис Қонунчилик палатаси ва маҳаллий кенгашлар депутатлигига ўтказиладиган сайловлар бўйича ташкил этилган учта сайлов округи аҳолиси қамраб олинди.

Ушбу сайлов участкасига ташриф буюрган ДСҚ раҳбарияти ва ходимлари сайловчилар учун барча зарур шарт-шароитлар яратилганига ишонч ҳосил қилдилар. Жумладан, бу ерда маҳаллий Кенгашлар депутатлигига номзодларнинг сайловолди дастури билан танишиш учун барча имконият мавжуд.

Учрашувларнинг учинчи босқичи интерфаол тарзда ўтди. “Китоб олами” мажмуасида 157 нафар тадбиркор ва бухгалтерлар “open space” форматида учрашдилар.

Ишбилармон доира вакиллари ўзлари учун қулай шароитда ДСҚ раҳбариятига саволлар бериб, батафсил жавоб олиш имкониятига эга бўлдилар.

Ноодатий формат барча хўжалик субъектлари учун энг долзарб масалалар, шу жумладан, 2020 йил 1 январдан бошлаб электрон ҳисоб-фактураларнинг амалиётга жорий этилаётганини атрофлича муҳокама қилиш имконини берди.

Тадбиркорларни бундан буён электрон ҳисоб-фактураларнинг юритилиши боис унга ҚҚСни ҳисобга олиш бўйича қўшимча устунлар киритиш ва ЭҲФни олишда SMS-хабарномаларни жўнатиш имкониятига доир масалалар қизиқтирди.

Шунингдек, мулоқотлар давомида Маълумотларни қайта ишлаш марказини модернизациялаш, ДСҚ серверларини янада кучайтириш, Электрон давлат солиқ хизматлари порталининг имкониятларини кенгайтириш муҳокама қилинди. Умумий олганда, юздан ортиқ саволлар йўлланди.

Бир сўз билан айтганда, бу каби тадбирлар солиқ органларининг фуқароларга янада яқинлашиши, қатор долзарб масалалар ҳал қилинишида айни муддао бўлмоқда.

ДСҚ Матбуот хизмати