2019 yil 17 dekabrь kuni Davlat soliq qoʼmitasida “Halollik va shaffoflik – soliq toʼlovchilar ishonchining garovi” mavzusida jurnalistlar va blogerlar ishtirokida matbuot anjumani tashkil etildi.

Tadbirda bugungi kunda soliq tizimidagi dolzarb yoʼnalishlar tahlil etildi.

Xususan, davlat soliq xizmati organlari tomonidan 2019 yil davomida amalga oshirilgan ishlar va erishilgan natijalar;

yangi tahrirdagi Soliq kodeksiga asosan 2020 yil 1 yanvardan amalga kiritilayotgan asosiy oʼzgarishlar;

rebrending oʼtkazilgani bois endilikda soliq xizmati organlari yangi qiyofada namoyon boʼlib, servis koʼrsatuvchi idoraga aylanayotgani;

korruptsiyaga qarshi kurashish boʼyicha olib borilayotgan ishlar xususida batafsil maʼlumotlar berildi.

Davlat soliq qoʼmitasi rahbariyati hamrohligida ommaviy axborot vositalari vakillari va blogerlar DSQ huzuridagi Yirik soliq toʼlovchilar boʼyicha hududlararo davlat soliq inspektsiyasi faoliyati bilan yaqindan tanishtirildi. Inspektsiya jamoasi oldiga qoʼyilgan vazifalar, faoliyat yoʼnalishi, istiqboldagi rejalar haqida soʼzlab berildi.

Shundan soʼng DSQ rahbariyati jurnalistlar va blogerlar bilan bir davra atrofida yigʼilib, tadbir interaktiv usulda davom ettirildi.

Qayd etilganidek, bugungi kunda DSQ faoliyatining ustuvor yoʼnalishi inson omilini qisman yoki butunlay istisno qiladigan maxsus dasturiy mahsulotlarni yaratishga qaratilgan.

Shu bois 2020 yil 1 yanvardan moratoriy bekor qilinishi bilan bir vaqtda, barcha joyda shaffoflik va oshkoralikni taʼminlash uchun xavfni tahlil qilishning yangi tizimi joriy etilmoqda.

Ushbu tizim mustaqil ravishda tashqi aralashuvlarsiz, tadbirkorlar faoliyatini tahlil qilish va soliqqa oid huquqbuzarlik xavfini baholash imkonini beradi.

Endilikda soliq organlari masʼul xodimlari oʼzboshimchalik bilan kimni tekshirish va qaysi turdagi tekshirishni qoʼllash boʼyicha qaror qabul qilish huquqiga ega emaslar: ushbu jarayonlarning barchasi inson omilidan xoli boʼlgan avtomatlashtirilgan tizim tomonidan bajariladi.

Xavflarni tahlil qilish dasturiga muvofiq, amaldagi barcha xoʼjalik yurituvchi subʼektlar maʼlum mezonlar asosida avtomatik ravishda 3 segmentga – yashil, sariq va qizil yoʼlaklarga boʼlinadi.

 2020 yil 1 yanvardan boshlab onlayn nazorat-kassa mashinalari va virtual kassa apparatlari bosqichma-bosqich joriy etiladi.

Bu savdo va xizmat koʼrsatish sohasidagi hisob-kitoblarni yanada shaffof holga keltirish, yashirin naqd pul aylanishini qisqartirish va jamoatchilik nazoratini oʼrnatishda muhim ahamiyatga ega.

2020 yildagi yana bir muhim yangilik, 1 yanvardan boshlab oʼzaro hisob-kitoblar tizimiga elektron hisobvaraq-fakturalarni majburiy tartibda joriy etilayotgani bilan bogʼliq.

Elektron hisobvaraq-fakturalardan foydalanish qator afzalliklarga ega. Jumladan, hujjatlar almashinuvi juda qulay va xavfsiz boʼladi, soliqqa tortish va hisobotlar jarayoni shaffof tarzda amalga oshiriladi.

Bundan tashqari, hozirda soliq toʼlovchilarga koʼrsatilayotgan xizmatlar ustidan nazorat olib borish tizimi ham joriy etildi.

Joylardagi huquqbuzarliklarning oldini olish uchun respublikamizning barcha hududlaridagi davlat soliq xizmati organlari (200 ta) fuqarolarni qabul qilish va ularga qanday darajada soliq xizmatlari koʼrsatayotganini onlayn kuzatib borish uchun maxsus kameralar bilan jihozlandi.

Ochiq va yuzma-yuz muloqot tarzida oʼtgan matbuot anjumanida jurnalist va blogerlarni qiziqtirgan barcha savollarga DSQ rahbariyati va masʼul xodimlari tomonidan atroflicha javoblar yoʼllandi.

Soliq toʼlovchilar bilan munosabatlarni yanada yaxshilash yuzasidan oʼzaro fikr almashilib, anjuman ishtirokchilarining takliflari mamnuniyat bilan qabul qilindi.

DSQ Matbuot xizmati