2020 йил июль ойида Давлат солиқ қўмитаси ютуқли чек ўйини бошланган эди. Мазкур ютуқли ўйиннинг бешинчи тиражида бутун мамлакат истеъмолчилари иштирок этди. Унда суперютуқ – Chevrolet Nexia 3 автомобили қашқадарёдалик иштирокчига насиб этди. 25 ноябрь ҳолатига навбатдаги олтинчи тиражи учун 32 мингдан зиёд чек рўйхатдан ўтказилди. Бу борада Тошкент шаҳри (17 715 та), Бухоро вилояти (2 302 та), Қорақалпоғистон Республикаси (1 652 та), Сурхондарё (1 455 та) ва Самарқанд вилоятлари (1 452 та) аҳолиси бошқа ҳудудларга нисбатан фаоллик кўрсатмоқда.

Ютуқли чек ўйинлари оммалашиб бориши баробарида онлайн назорат-касса машинаси ва виртуал кассалар чекларини рўйхатдан ўтказиш қоидаларига оид саволлар кўпаймоқда.

Масалан, “96 та чекни рўйхатдан ўтказдим, лекин ўйинда 21 таси иштирок этди. Нима учун?” ёки “Агар чек SOLIQ мобил иловасида рўйхатдан ўтказилса, SMS хабарнома келиши керакми?” Шу ва шунга ўхшаш саволларга жавоб олиш мумкин бўлган маълумотлар ДСҚ расмий манбаларида бир неча бор эълон қилинган.

Такрорлаб ўтамиз!

Агар ютуқли чек ўйинларида иштирок этишни истасангиз, дорихона, АЁҚШ, алкоголь ва тамаки маҳсулотлари савдо нуқталари ҳамда йирик савдо тармоқларида харидни амалга оширганингизда чек талаб қилинг. Амалдаги қонунчиликка кўра ушбу субъектларда онлайн назорат-касса машиналари (ёки виртуал кассалар) ўрнатилиши ва ҳар бир чекда фискал белги ва QR-код бўлиши лозим.

Иштирок этиш учун икки усулдан бирини танлаб чекларни рўйхатдан ўказинг:

– SOLIQ мобил иловаси (ёки Payme электрон тўлов тизими) орқали чекнинг QR-кодини сканерлаш ;

– чекнинг (12-хонали) фискал белгисини 1077 рақамига SMS тарзида юбориш.

Қоидаларга диққат қилинг!

– Ҳар бир иштирокчи бир кунда битта савдо нуқтасидан фақат 2 та чекни рўйхатдан ўтказиши мумкин – бу кунлик чеклов. Бунда чекларни умумий рўйхатдан ўтказиш сони чекланмаган. Яъни турли савдо нуқталари бўйича бир неча ўнлаб чекларни рўйхатдан ўтказиш мумкин.

– Харид миқдори 1000 (минг) сўм ва ундан юқори бўлган чекларни рўйхатдан ўтказиш керак. Яъни ютуқли ўйинда иштирок этувчи чеклар харид миқдори энг камида 1000 (минг) сўм бўлиши лозим.

– 1077 рақами орқали SMS юбориш абонент тариф режаси доирасида ечилади. Яъни SMS учун мобил оператор томонидан пул ечилади.

– Ўйин ўтказилишига бир кун қолганда ёки ўйин куни иштирокчиларга чеклари қайси рақам остида рўйхатга олингани, тираж қачон ва қайси телеканал орқали жонли эфирга узатилиши ҳақида SMS хабарнома юборилади.

– Чекларни асл ҳолида сақланг: соврин бутун ҳолатдаги чек ва эгасининг шахсини тасдиқловчи ҳужжатлар тақдим этилганда берилади.

Иштирокчиларга ёрдам

Aгар сизда чекларни рўйхатдан ўтказишда муаммолар юзага келса, @DSQ_Pressa билан боғланишингизни ёки https://t.me/ofdfmo гуруҳига қўшилишингизни тавсия қиламиз. Ишчи гуруҳ сизнинг муаммоингизни кўриб чиқиб, ижобий ҳал этишга ёрдам беради. Шунингдек, Call-марказининг 1198 рақами орқали ҳам боғланиш мумкин.

Яқин кунларда ютуқли чек ўйинларининг навбатдаги – VI тиражи ўтказилади. Чекларни рўйхатдан ўтказинг ва Chevrolet Nexia 3 ёки бошқа қимматбаҳо совғаларни ютиб олинг!

ДСҚ Матбуот хизмати