Давлат солиқ қўмитасида онлайн-НКМ ва виртуал кассаларни давлат солиқ хизмати органларида рўйхатдан ўтказиш тартибига бағишланган йиғилиш бўлиб ўтди. Унда республикада фаолият олиб бораётган 10 га яқин онлайн-НКМ ва виртуал кассалар ишлаб чиқарувчи тадбиркорлик субъектлари вакиллари иштирок этди.

Йиғилишда Давлат солиқ қўмитаси раиси ўринбосари Абдулла Азизов ҳамда “Янги технологиялар” илмий-ахборот маркази директори Ҳаётжон Насруллоев қатнашди.

Мулоқотлар давомида асосий эътибор онлайн-НКМ ва (ёки) виртуал кассаларни давлат солиқ хизмати органларида рўйхатдан ўтказишда тадбиркорлик субъектлари вакиллари  дуч келаётган муаммо ёки тўсиқларга қаратилди.

Таъкидланишича, айни пайтда онлайн-НКМ ва виртуал касса дастурий маҳсулотини ишлаб чиқарувчи 23 та тадбиркорлик субъектлари мавжуд. Ҳозирга қадар уларнинг 10 та онлайн-НКМ ёки виртуал касса дастурий маҳсулотининг техник ва функционал тавсифларига мувофиқлиги юзасидан фискал маълумотлар операторининг хулосаси берилган. Аммо онлайн-НКМ ёки виртуал касса дастурий маҳсулотининг Давлат реестрига киритиш ишлари кечикмоқда. Бунга сабаб нима?

Тадбиркорлик субъектлари вакилларининг сўзларига кўра, онлайн-НКМ ёки виртуал касса дастурий маҳсулотининг Давлат реестрига киритиш учун талаб этиладиган Киберхавфсизлик маркази хулосасини олиш жараёни узоқ вақт кетаётганлиги айтилди. Қолаверса, мазкур жараён учун амалга оширилиши лозим бўлган тўлов миқдори қимматлик қилаётганлиги ишлаб чиқарувчилар томонидан билдирилди.

Бугунги кунда “E-POS SYSTEMS” МЧЖнинг “E-POS” виртуал кассаси, “TORGUEM SOFTWARE” МЧЖнинг “Cashbox” ва, “FOTON” МЧЖнинг “Orion-100F” русумли онлайн‑НКМларини Давлат реестрига киритиш учун Давлат солиқ қўмитасига ариза ва бошқа керакли ҳужжатлар тақдим қилинган. Давлат солиқ қўмитаси раиси ўринбосари А.Азизов қайд этишича, мазкур дастурий маҳсулот ва қурилмалар камчиликлари ишчи гуруҳ ҳамда тадбиркорлар билан биргаликда тўғирланмоқда. Шу билан бирга, Давлат солиқ қўмитаси маҳсулот ва қурилмаларни реестрига киритилишида тезкор ёрдам беришга тайёрлиги таъкидланди

Тадбиркорлик субъектлари вакилларини қийнаётган яна бир масала ваколатли органнинг махсус ҳисоб рақамига захирага маблағ қўйиши билан боғлиқ. Яъни қонунчиликка асосан Давлат солиқ қўмитасида рўйхатга олинган онлайн-НКМ ва виртуал касса сонига нисбатан базавий ҳисоблаш миқдоридан келиб чиқиб, ваколатли органнинг махсус ҳисоб рақамига захирага маблағ қўйиши лозим. Йиғилишда тадбиркорлик субъектлари томонидан ушбу маблағларни бўлиб тўлашни йўлга қўйиш таклифи илгари сурилди.

Маълумки, Техник хизмат кўрсатиш маркази тадбиркорлик субъектларига узлуксиз, 24 соат мобайнида кафолатли техник хизмат кўрсатади. Агар онлайн‑НКМ ва виртуал касса носоз ҳолга келиб қолса,  ТХКМ уларни бир кун ичида таъмирлаши ёки ўзларида мавжуд заҳирадаги қурилмаларни ўрнатиши лозим. Тадбир қатнашувчилари томонидан ушбу муддатни 3 кунга узайтирилиши мақсадга мувофиқлиги билдирилди.

Мутасаддилар онлайн-НКМ ёки виртуал кассалар тизимини янада такомиллаштириш бўйича шу ва бошқа бир қатор масалаларнинг ҳар бирини тегишли тартибда ўрганиш, таҳлил қилиш  ва энг асосийси, уларнинг ечимини топиш бўйича ўз фикр-мулоҳазаларини билдиришди.

“Янги технологиялар” илмий-ахборот маркази Жамоатчилик билан алоқалар хизмати