Joriy yilning 2 avgust kuni Davlat soliq qo‘mitasida O‘zbekiston stol tennisi Federatsiyasi Raisi Sherzod Davlyatovich Kudbiyev rahbarligida Federatsiyaning navbatdan tashqari saylov Konferensiyasi bo‘lib o‘tdi.

Unda Federatsiya va uning hududiy bo‘linmalari xodimlaridan iborat 19 nafar delegat ishtirok etdi.

Shu bilan birga, O‘zbekiston Respublikasi Sportni rivojlantirish vaziri Ikramov Adxam Ilxamovich, Milliy olimpiya qo‘mitasi Bosh kotibi Kasimov Oybek Omilovich, mutaxassislar, murabbiylar, sportchilar va hakamlar, shuningdek, Davlat soliq qo‘mitasi markaziy apparati va hududiy davlat soliq boshqarma boshliqlari (videokonferensaloqa platformasi orqali) qatnashdi.

Konfrensiyada, O‘zbekiston Respublikasi Sportni rivojlantirish vaziri A.Ikramov, Milliy olimpiya qo‘mitasi Bosh kotibi O.Kasimovlar so‘zga chiqib Federatsiya faoliyatini yanada rivojlantirish bo‘yicha olib borilayotgan ishlar yuzasidan o‘z takliflarini berdi va O‘zbekiston stol tennisi federatsiyasi faoliyatiga omad va muvaffaqiyatlar tiladi.

Kun tartibida Federatsiya Ustavi va tashkiliy tuzilmasini tasdiqlash. Jumladan, Federatsiya Bosh kotibi, Ijrochi direktori, Rais o‘rinbosarlari va hududiy bo‘linmalar rahbarlarini tayinlash, shuningdek, sohadagi mavjud muammolarni bartaraf etish, stol tennisini rivojlantirish bo‘yicha aniq chora-tadbirlarni belgilab olish, musobaqalar o‘tkazish uchun moddiy-texnik bazani mustahkamlash, professional sportchilar va murabbiylarni tayyorlash kabi masalalar ko‘rib chiqildi.

Federatsiyaning yangi tasdiqlangan shtat birliklarini malakali kadrlar bilan to‘ldirilishi va ular mamlakatimizda stol tennisini rivojlantirish uchun eng chekka hududlargacha yetib borishi, har bir muammoni yechish bo‘yicha amaliy yordamlar ko‘rsatilishi taʼkidlandi.

Konferensiyada Federatsiya Bosh kotibi lavozimiga Pardayev Sherzod Sharobiddinovich, Ijrochi direktor lavozimiga Muzafarov Oybek Baxodirovich nomzodlari taklif etildi va bir ovozdan tasdiqlandi.

Shuningdek, Xvan Grigoriy Mangemovich, Maxmudova Saida Saidikromovna, Baymuxamedov Oybek Shuxratovich, Ruzemuxamedov Nurulla Sunnatullayevich, Mamasaidov Xasan Raxmanberdiyevich, Abdullayev Axadjon Alisherovich, Saidov Baxrom Rustamovichlar belgilangan tartibda Federatsiya Raisi o‘rinbosari lavozimiga tayinlandi.

Hududiy davlat soliq boshqarmalari boshliqlariga Federatsiyaning hududiy bo‘linmalari salohiyatini oshirish va mavjud muammolarni tezkorlik bilan hal qilish vazifalari yuklatiladi. Bevosita stol tennisi bilan esa, ijrochi direktor lavozimida ishlaydigan haqiqiy mutaxassislar shug‘ullanadi.

Federatsiya Raisi Sh.Kudbiyev sohada samarali boshqaruvni yo‘lga qo‘yish uchun yagona ish prinsipiga ega bo‘lgan umumiy maqsad va vazifalarni hisobga olgan holda kuchli vertikal nazorat tizimi bo‘lishi kerakligini va bu borada dastlabki katta qadam tashlanganini taʼkidladi.

Konferensiya davomida sohani rivojlantirish bo‘yicha amalga oshirilishi lozim bo‘lgan ishlar, kechiktirib bo‘lmaydigan vazifalar belgilab olindi.

Ular quyidagilardan iborat:

- zamonaviy sport zal, sport maydonchasi, basseyn, yotoqxona va boshqa zarur imkoniyatlarga ega stol tennisi kompleksini barpo etish;

- Federatsiya va uning hududiy bo‘linmalari shtat birliklarini malakali mutaxassislar bilan to‘ldirish;

- mahallalarda stol tennisi markazlarini tashkil etish;

- stol tennisiga ixtisoslashgan oliy o‘quv muassasalarini stol tennisi uskunalari bilan jihozlash;

- stol tennisi bo‘yicha professional klublar va havaskor yoshlar o‘rtasida yagona musobaqalar tizimini joriy etish;

- murabbiylar, hakamlar va stol tennisi bo‘yicha boshqa mutaxassislarni tayyorlash tizimini takomillashtirish, xorijiy davlatlarda malaka oshirish tizimini joriy qilish;

- O‘zbekiston milliy terma jamoasining nufuzli xalqaro musobaqalarda ishtirok etishi uchun sifatli va samarali tayyorgarlikni taʼminlash, malakali xorijiy mutaxassislarni jalb qilish;

- imkoniyati cheklangan shaxslar uchun stol tennis bilan shug‘ullanishiga sharoit yaratish;

- davlat tashkilotlarida stol tennisini ommalashtirish, tashkilotlar xodimlari uchun stol tennisi bilan shug‘ullanishi imkoniyat yaratish.

Ustuvor yo‘nalishlar va vazifalarni amalga oshirish bo‘yicha aniq chora-tadbirlar belgilangan “Yo‘l xaritasi”ni ishlab chiqiladi.

Konferensiyada Federatsiya raisi o‘rinbosarlari o‘zlariga bildirilgan ishonch uchun minnatdorlik bildirdi va yuklatilgan vazifalarni sidqidildan bajarishda bor bilim va tajribalarini ishga solishga vada berdi. Shuningdek sohani rivojlantirish yuzasidan takliflar berdi.