Давлат солиқ қўмитаси карантин даврида товарлар экспортига қўшилган қиймат солиғининг ноль ставкасини қўллаш натижасида ҳосил бўлган солиқ суммасини қайтариш бўйича ишларни янада кучайтирди.

Инқирозга қарши шароитда ушбу ҳуқуқнинг амалга оширилиши экспорт қилувчи корхоналарни, шунингдек молиявий қийин аҳволга тушиб қолган компанияларни тизимли қўллаб-қувватлашда муҳимдир.

Эслатиб ўтамиз, солиқ тўловчиларнинг солиқлар, пенялар ва жарималарнинг ортиқча тўланган ёки ортиқча ундирилган суммаларини ўз вақтида зачетга олиш ёки қайтариш ҳуқуқи Солиқ кодексининг 21-моддаси билан тартибга солинади.

Ҳужжатларни тақдим этиш ва ҚҚСни қайтариш жараёнлари сезиларли даражада соддалаштирилди. Энди солиқ тўловчи аввалгидек, ҚҚСни қайтариш учун ҳудудий давлат солиқ бошқармаси орқали эмас, тўғридан-тўғри Давлат солиқ қўмитасига ариза билан мурожаат қилади.

Ортиқча тўсиқларнинг олиб ташланиши ўзаро муносабатларни сезиларли даражада осонлаштирди: энди солиқ тўловчи шахсий кабинети  орқали ДСҚга электрон шаклда мурожаат юбориши кифоя. Кўриб чиқиш жараёни 3 кунгача қисқартирилди. Шунингдек, ушбу масала билан шуғулланадиган ишчи гуруҳи таркиби кенгайтирилди.

Жорий даврда Давлат солиқ қўмитаси кўриб чиққанидан сўнг, хулосаларнинг 80% дан ортиғи Молия вазирлиги Ғазначилигига юборилди. Натижада қайтарилган ҚҚСларнинг умумий миқдори 263,2 млрд. сўмни ташкил этди. 119 та солиқ тўловчи давлат бюджетидан ушбу маблағларни  қабул қилиб олди.

Улар орасида йирик хўжалик юритувчи субъектлардан  – «Uzbekistan Airways» АЖ (81,6 млрд. сўм), «Indorama Kokand Textile» АЖ (47,7 млрд. сўм), «Natural Gas-Stream» ҚК (31,9 млрд. сўм), «Sulton Tex Group» ХК (15,3 млрд. сўм), «Posco International Textile» МЧЖ (24 млрд. сўм) бор. Қавс ичида Давлат солиқ қўмитаси хулосасига кўра корхоналарга қайтарилган суммалар кўрсатилган. Бу айланма маблағларни тўлдириш, хом ашё сотиб олишни давом эттириш ва ходимларга иш ҳақини тўлаш имконини беради.

Тўланган ҚҚС миқдорини қайтариш имкониятига эга бўлган солиқ тўловчилар орасида Тошкент, Бухоро ва Қашқадарё вилоятларида фаолият олиб борувчи кўплаб текстиль корхоналари мавжуд. «Uztex Group» (14 млрд. сўм), «Chinoz textile» (4 млрд. сўм), «Mergan Teks» (3,2 млрд. сўм), «Oq Saroy Textile» (5,1 млрд. сўм) шулар жумласидан.

Солиқ ҳисоботида номувофиқликлар аниқланган мурожаат эгаларига хатоликларни тузатиш бўйича тушунтиришлар берилди. Улар кўриб чиқиш учун қайта ариза юборишга ҳақли.

ҚҚСни қайтариш учун ДСҚга ариза берган экспортчилар рўйхати ҳар куни кўпаймоқда, қайтариш жараёни давом этмоқда.

ДСҚ Матбуот хизмати.